Primeira. Obxecto e ámbito de aplicación

1. Esta instrución ten por obxecto establecer o calendario, os criterios, a información necesaria e as medidas estruturais e organizativas que deberán terse en conta na elaboración do proxecto de Orzamento da Universidade de Santiago de Compostela para o exercicio 2027.

2. As previsións desta instrución serán de aplicación ás Vicerreitorías, Centros, Departamentos, Institutos e Centros de investigación, Servizos, Unidades Administrativas e restantes estruturas da Universidade con responsabilidade na xestión de ingresos ou gastos ou que dispoñan de información relevante para a elaboración do orzamento.

3. Incluirase igualmente no proxecto de orzamento a información orzamentaria que corresponda das entidades públicas vinculadas ou dependentes da USC, consonte a normativa que resulte de aplicación.

Segunda. Criterios xerais para a elaboración do orzamento

A elaboración das propostas que servirán de base para a confección do proxecto de Orzamento para 2027 atenderá aos seguintes criterios xerais:

a) Prudencia na estimación dos ingresos, de maneira que as previsións se fundamenten en información suficientemente contrastada e, sempre que resulte posible, nunha base documental ou nunha expectativa razoablemente acreditada de financiamento.

b) Suficiencia financeira, procurando que os gastos que se propoñan conten coa correspondente cobertura financeira.

c) Prioridade dos compromisos adquiridos, singularmente dos que deriven de obrigas contractuais, actuacións plurianuais ou outras obrigas que deban ser atendidas no exercicio 2027.

d) Garantía do funcionamento ordinario dos servizos e actividades universitarias, priorizando os recursos necesarios para asegurar a continuidade das funcións docentes, investigadoras, de transferencia e de xestión.

e) Eficiencia na asignación dos recursos, de maneira que as novas necesidades e actuacións sexan avaliadas atendendo á súa prioridade institucional, impacto e dispoñibilidade efectiva de financiamento.

f) Sustentabilidade financeira e perspectiva plurianual, tendo en conta non só o gasto previsto para 2027, senón tamén os compromisos que as decisións adoptadas poidan xerar nos exercicios posteriores, especialmente cando teñan carácter estrutural ou recorrente.

g) Cumprimento das regras fiscais, de maneira que a elaboración do orzamento e a determinación dos créditos se realicen atendendo ás esixencias de estabilidade orzamentaria, sustentabilidade financeira e regra de gasto que resulten de aplicación á Universidade no exercicio 2027, de conformidade, en particular, co previsto na Lei orgánica 2/2012, do 27 de abril, de estabilidade orzamentaria e sustentabilidade financeira.

Terceira. Unidade de orzamentación

Os orzamentos da Universidade de Santiago de Compostela elaboraranse tendo como unidade de conta o euro.

Cuarta. Previsión de ingresos

1. As unidades que xestionen ingresos ou dispoñan de información relevante para a súa estimación deberán comunicar á Xerencia as previsións correspondentes ao exercicio 2027 dentro do prazo que se estableza no calendario de elaboración.

2. As previsións deberán identificar, cando menos:

a) Os ingresos derivados da prórroga do Plan Galego de Financiamento para o exercicio 2027

b) Os ingresos derivados de prezos públicos, tarifas e prestacións de servizos.

c) As transferencias correntes e de capital procedentes da Comunidade Autónoma, do Estado ou doutras administracións públicas.

d) Os ingresos derivados de subvencións, convenios e outras resolucións de financiamento que teñan anualidade ou execución prevista durante 2027.

e) Os ingresos derivados de proxectos e actuacións financiados con fondos europeos ou outros instrumentos de financiamento externo.

f) Os ingresos derivados de contratos, convenios e actividades de investigación, transferencia ou prestación de servizos que teñan incidencia no exercicio.

g) As actuacións que se veñan desenvolvendo en exercicios sucesivos e para as que exista unha expectativa suficientemente fundada de continuidade do financiamento.

h) Calquera outro ingreso do que exista información que permita realizar unha estimación razoable para o exercicio 2027.

3. A Xerencia realizará a estimación global de ingresos tendo en conta a información remitida polas unidades, a execución do exercicio corrente, a evolución dos ingresos nos exercicios precedentes e a información dispoñible sobre o financiamento da USC para o exercicio 2027.

Quinta. Previsión e determinación das necesidades de gasto

4. A Xerencia coordinará coas Vicerreitorías e cos Centros, Departamentos, Servizos, Unidades e restantes estruturas organizativas con capacidade de gasto a determinación das necesidades para o exercicio 2027.

5. As propostas deberán identificar adecuadamente:

a) Os gastos derivados de compromisos adquiridos en exercicios anteriores que deban imputarse total ou parcialmente a 2027.

b) Os gastos necesarios para garantir o funcionamento ordinario das unidades e servizos.

c) Os gastos derivados de contratos vixentes e das contratacións previstas que deban producir efectos económicos en 2027.

d) Os gastos asociados a subvencións, axudas, bolsas ou transferencias que se prevexa convocar ou conceder durante o exercicio.

e) Os gastos derivados de proxectos, convenios e outras actuacións con financiamento afectado.

f) Os investimentos previstos para 2027, con indicación, cando proceda, da súa fonte de financiamento e da súa posible incidencia plurianual.

g) As novas necesidades ou actuacións propostas para o exercicio, diferenciándoas dos compromisos previamente adquiridos e dos gastos recorrentes.

6. As novas actuacións que impliquen compromisos de gasto para exercicios futuros deberán incorporar información suficiente para avaliar a súa incidencia económica plurianual.

Sexta. Procedemento e calendario de elaboración

O proceso de elaboración do Orzamento da USC para 2027 desenvolverase, con carácter xeral, nas seguintes fases:

1. Recollida da información de ingresos e gastos. As unidades responsables deberán facilitar á Xerencia a información necesaria nos formatos, procedementos e prazos que se determinen. Para estes efectos, a Xerencia comunicará oportunamente as instrucións e ferramentas que se empregarán para a recollida da información.

2. Estimación do escenario de ingresos. A Xerencia elaborará unha estimación dos recursos dispoñibles para 2027 a partir da información sobre o financiamento público previsto, da execución do exercicio corrente e das restantes fontes de financiamento.

3. Elaboración das liñas xerais do orzamento e límite de gasto non financeiro. O proxecto de liñas xerais do orzamento incorporará a proposta correspondente ao límite de gasto non financeiro para o exercicio 2027, nos termos previstos na normativa aplicable.

4. Elaboración do proxecto de orzamento. A Xerencia integrará as previsións de ingresos e as propostas e necesidades de gasto, realizando os axustes necesarios para garantir o equilibrio, a sustentabilidade e a coherencia global do proxecto.

5. Tramitación perante os órganos de goberno. O proxecto deberá ultimarse coa antelación suficiente para a súa tramitación e aprobación polos órganos competentes antes do inicio do exercicio 2027.

CALENDARIO

• Remisión da información para a previsión inicial de ingresos:31/10/2026

• Remisión das necesidades e previsións de gasto:31/10/2026

• Remisión das propostas de tarifas:06/11/2026

• Presentación das liñas xerais do orzamento:segundo o calendario institucional do Claustro Universitario.

• Informe de impacto por razón de xénero:15/11/2026

• Informe de impacto ambiental:15/11/2026

• Debate e aprobación do proxecto de orzamento por parte do Consello de Goberno:segundo o calendario institucional do Consello de Goberno.

• Debate e aprobación dos Orzamentos por parte do Consello Social segundo o calendario institucional do Consello Social.

Sétima. Estrutura orzamentaria

Para a elaboración do proxecto de orzamento teranse en conta a organización existente, a natureza económica dos ingresos e gastos e os fins e obxectivos aos que se destinan os recursos.

I. Ingresos

a) Estrutura orgánica.

O orzamento de ingresos elaborarase de acordo coa clasificación orgánica que figure no Anexo I.

b) Estrutura económica.

Os recursos incluídos nos estados de ingresos ordenaranse segundo a súa natureza económica conforme coa clasificación establecida no Anexo II.

O Servizo de Orzamentación e Planificación poderá crear os conceptos e subconceptos que resulten necesarios dentro da estrutura económica establecida.

II. Gastos

a) Estrutura orgánica.

O orzamento de gastos elaborarase de acordo coa clasificación orgánica recollida no Anexo I.

b) Estrutura económica.

Os créditos incluídos nos estados de gastos clasificaranse segundo a súa natureza económica de acordo coa clasificación que se estableza no Anexo III.

O Servizo de Orzamentación e Planificación poderá establecer os conceptos e subconceptos necesarios para a adecuada xestión e rexistro das operacións.

III. Estrutura funcional por programas

Os créditos dos estados de gastos agruparanse segundo a estrutura funcional por programas establecida no Anexo IV.

O Servizo de Orzamentación e Planificación poderá crear os programas que resulten necesarios para adaptar a estrutura orzamentaria ás necesidades organizativas e funcionais da Universidade.

Oitava. Unidades descentralizadas de gasto

Para os efectos da xestión descentralizada dos créditos, manteranse as unidades descentralizadas de gasto nos termos establecidos no Regulamento de xestión orzamentaria.

Corresponderá á Xerencia o mantemento da clasificación destas unidades e a determinación das unidades de gasto ou ingreso sobre as que exerzan responsabilidade, que se reflectirán nos correspondentes estados de ingresos e gastos.

Novena. Entidades vinculadas ou dependentes

As entidades vinculadas ou dependentes da USC deberán facilitar, nos prazos e formatos que determine a Xerencia, a información necesaria para a súa incorporación ao proxecto de orzamento e, cando proceda, para dar cumprimento ás obrigas de consolidación e de información económico-financeira que resulten aplicables.

A información incluirá, cando corresponda, os seus orzamentos estimativos de explotación e capital e a previsión das achegas ou transferencias que deban recibir da USC.

Décima. Tarifas e prezos

As unidades que presten servizos suxeitos a tarifas ou prezos deberán revisar as contías aplicables e comunicar á Xerencia:

a) as propostas de creación, supresión ou modificación de tarifas;

b) a previsión de ingresos para o exercicio 2027;

c) a información económico-financeira que resulte necesaria para xustificar as propostas presentadas.

Décimo primeira. Informe de impacto por razón de xénero

A Oficina de Igualdade de Xénero coordinará a elaboración do informe de impacto por razón de xénero do proxecto de orzamento, que deberá remitirse á Xerencia dentro do prazo establecido no calendario.

Décimo segunda. Informe de impacto ambiental

A Area de Infraestruturas coordinará a elaboración do informe de impacto ambiental do proxecto de orzamento e remitirao á Xerencia no prazo establecido.