Dada a proliferación de supostos onde o alumnado asegura ter unha materia aprobada pero que no seu expediente figura como suspensa e, ao destruírse ou perderse o material de avaliación utilizado para cualificar a materia debido ao tempo transcorrido, o profesorado non pode comprobar se o alegado polo alumno é certo ou non, compre aclarar o establecido na normativa aplicable e ditar as pautas de actuación a seguir polo profesorado cando se dea a mencionada circunstancia.

O apartado primeiro do artigo 27 do Real Decreto 1791/2010, de 30 de decembro, polo que se aproba o Estatuto do Estudante Universitario, establece que “os traballos e memorias de prácticas con soporte material único serán conservadas polo profesor ata a finalización do curso seguinte nos termos previstos na normativa autonómica e da propia universidade. Rematado este prazo e, de acordo coa citada normativa, serán devoltas aos estudantes asinantes a petición propia, salvo que estea pendente a resolución dun recurso, inferíndose do citado precepto que, se non existe petición dos estudantes para que se lles sexan devoltos os traballos e memorias prácticas, estes documentos poderán ser destruídos unha vez finalice o prazo de custodia obrigatoria, sempre que non estea pendente a resolución dun recurso. Pola súa banda o apartado terceiro do mesmo artigo establece que “os proxectos de fin de carreira, traballos de fin de grado e máster, así como as teses doutorais, rexeranse pola súa normativa especifica”.

Seguindo co mesmo criterio o artigo 29 do Real Decreto 1791/2010, de 30 de decembro, en relación cos exames realizados, establece que “os profesores deberán conservar o material escrito, en soporte de papel ou electrónico, das probas de avaliación ou, no seu caso, a documentación correspondente das probas orais, ata a finalización do curso académico seguinte nos termos previstos na normativa autonómica e da propia universidade. Nos supostos de petición de revisión ou de recurso contra a cualificación e, de acordo coa citada normativa, deberán conservarse ata que exista resolución firme.”

Pola súa banda, e en desenvolvemento da normativa citada, o artigo 7 da Normativa de Avaliación do Rendemento Académicodos Estudantes e de Revisión de Cualificacións ditada por esta universidade establece que os profesores deberán conservar o material escrito, en soporte papel ou electrónico, das probas de avaliación ou, no seu caso, a documentación correspondente das probas orais, ata a finalización do curso académico seguinte. Nos supostos de impugnación da cualificación deberán conservarse ata que exista resolución firme.

En relación cos TFG e os TFM o apartado cinco do artigo 9 da Normativa de Matrícula, Elaboración e Defensa dos TFG e TFM na USC, aprobada polo Consello de Goberno de 2 de maio de 2013, establece que ademais do réxime xeral de conservación de traballos, unha copia dos TFG e TFM en formato electrónico ou en papel quedará depositada no centro para usos docentes e de investigacións.

Por todo o anterior, dende esta Secretaría Xeral procede ditar a seguinte INSTRUCIÓN