Artigo 1. Obxecto

Esta norma ten por obxecto a regulación do réxime de redución docente e retributivo dos cargos e responsables académicos da Universidade de Santiago de Compostela.

Artigo 2. Cargos académicos

Son cargos académicos os establecidos como tal na normativa xeral de aplicación, os que se determinen nos Estatutos da USC e aqueloutros nos que se declare a súa equiparación polo

Consello de Goberno, sempre que cumpran os seguintes requisitos:

- Ter conferida inequivocamente, polo seu carácter unipersoal e non pola pertenza a un órgano colexiado, unha potestade de carácter directivo na organización ou na xestión da USC.

- Ter un nomeamento realizado por resolución reitoral

- Levar aparellada unha retribución económica e/ou o recoñecemento dunha redución do encargo docente na planificación académica da USC.

Artigo 3. Requisitos para o exercicio de cargos académicos

3.1. De conformidade co artigo 71 dos Estatutos da USC, para desempeñar cargos académicos é necesario

a) que o profesorado estea acollido ao réxime de dedicación a tempo completo

b) que o estudantado estea matriculado na modalidade de matrícula ordinaria

c) que o persoal de administración e servizos teña como único emprego o que desenvolva na Universidade de Santiago de Compostela

3.2. En ningún caso se poderá exercer a titularidade de máis dun cargo nin a de calquera deles simultaneamente coa de órganos unipersoais de goberno doutra universidade ou do Consello Superior de Investigacións Científicas e dos seus centros respectivos, ou coa de representante sindical.

Artigo 4. Clasificación dos cargos académicos

4.1. Conforme ao establecido no Real Decreto 1086/1989, son cargos académicos unipersoais xerais os seguintes:

- Reitor/a

- Vicerreitor/a e Secretario/a Xeral

- Decano/a e Director/a de Escola Técnica Superior

- Director/a de Departamento e de Instituto Universitario

- Vicedecano/a, Subdirector/a e Secretario/a de Facultade e de Escola Técnica Superior

- Secretario/a de Departamento

4.2. Tamén teñen a consideración de cargos académicos unipersoais os previstos como tal nos estatutos da USC e os que acorde o Consello de Goberno conforme ao establecido neste regulamento.

Artigo 5. Nomeamento e cese de cargos académicos

5.1. As propostas de nomeamento de cargos académicos dirixiranse á Secretaría Xeral da USC, que valorará a súa procedencia e daralle o curso que corresponda.

5.2. O nomeamento dos cargos, agás o propio, será realizado polo reitor da USC, mediante resolución reitoral que será publicada no Taboleiro Electrónico Oficial da USC.

5.3. As propostas de perda da condición de cargo e de cese deberán remitirse á Secretaría Xeral da USC, que tramitará a resolución reitoral de cese, cos mesmos requisitos de publicidade que os nomeamentos.

Con carácter xeral, cando se produza o cese da persoa titular do cargo esta continuará en funcións ata o nomeamento da persoa que a substitúa, debendo atender exclusivamente os asuntos de mero trámite.

5.4. A Secretaría Xeral levará un seguimento de cada un dos mandatos. Se fora necesario, proporá ou ordenará a convocatoria de eleccións naqueles ámbitos onde se excedera a duración do mandato.

Artigo 6. Efectos do nomeamento de cargos académicos

6.1. Os efectos do nomeamento como cargo académico poderán ser:

a) Retributivos, coa percepción da compoñente singular do complemento específico por desempeño de cargo académico

b) De redución do encargo docente, conforme ao establecido neste regulamento

O desempeño do cargo poderá dar lugar aos dous efectos sinalados ou unicamente a un deles, segundo quede configurado.

6.2. Quen desempeñe un cargo académico terá dereito a percibir unha compensación polos gastos en que incorra no exercicio do cargo.

Artigo 7. Creación de novos cargos académicos polo Consello de Goberno

7.1. O Consello de Goberno, de xeito motivado, poderá establecer outros cargos académicos en función das necesidades de goberno, administración ou xestión da USC.

7.2. O acordo indicará o obxecto da creación, os efectos que se derivan da mesma de conformidade co artigo anterior e a súa asimilación, indicando o tipo de complemento retributivo e/ou de redución docente. Tamén indicará se o cargo ten carácter permanente ou temporal.

7.3. A revogación do cargo polo Consello de Goberno implicará o cese da persoa que o desempeñe.

Artigo 8. Complemento retributivo

8.1. De acordo co previsto na regulación xeral, existirán os seguintes complementos retributivos polo desempeño de cargo:

CARGO ACADÉMICO	CÓDIGOCOMPLEMENTO
Reitor	C1
Vicerreitor/a e Secretario/a Xeral	C2
Decano/a e Director/aEscolaTécnica Superior	C3
Director/a de Departamento e deInstituto Universitario	C4
Vicedecano/a, Subdirector/a eSecretario/a de Facultade e deEscola Técnica Superior	C5
Secretario/a de Departamento	C6

8.2. O importe deste complementos será o que se determine anualmente na normativa orzamentaria.

Artigo 9. Redución docente

Establécense os seguintes tipos de redución docente:

REDUCIÓN DOCENTE(horas/curso)	CÓDIGO REDUCIÓNDOCENTE
240	R1
150	R2
90	R3
60	R4
40	R5
30	R6
20	R7

Artigo 10. Responsables académicos

10.1. Por resolución reitoral poderán designarse responsables académicos, sen a consideración de cargo académico, nos seguintes supostos:

- Director/a ou subdirector/a en centros propios da USC de estudo e investigación, agás os centros singulares e equiparables.

- Subdirector/a de centros do Sistema Universitario de Residencias (SUR).

- Director/a e subdirector/a de Cátedras Institucionais.

- Representante da USC en empresas, institucións, fundacións, comisións e outros.

- Dirección, presidencia ou coordinación de grupos de traballo ou comisións que se formen na USC

10.2. As persoas designadas terán dereito á compensación polos gastos nos que incorran por razón da súa actuación, logo da aceptación dos mesmos polo órgano do que dependan. No caso de que teñan algún efecto adicional, de redución docente ou retributivo, este deberá figurar na resolución de nomeamento.

10.3. Con carácter ordinario as persoas designadas como responsables académicos deberán ter como única dedicación a da Universidade.

10.4. Darase conta ao Consello de Goberno das designacións que impliquen custo para a USC.

Artigo 11. Cargos e responsables académicos existentes na actualidade

11.1. No anexo I figuran os cargos académicos vixentes no momento da aprobación deste regulamento, cos seus correspondentes efectos.

11.2. Para a creación de novos cargos seguirase o procedemento establecido no artigo 5.

11.3. Terán a consideración de responsables académicos os que no momento da aprobación deste regulamento figuran no anexo II, cos efectos que nel se indican, e aqueles que foran designados ao abeiro do establecido no artigo 10.1 deste regulamento.

Artigo 12. Rexistro de cargos e designacións

A Secretaría Xeral levará un rexistro actualizado de cargos académicos. Tamén manterá actualizada a relación das designacións efectuadas por resolución reitoral.