Artigo 1.- Definicións

1. Enténdese por microdoazón:a liberalidade ou dación dunha cantidade monetaria ou dun ben, tanxible ou intanxible, sempre que tal cantidade ou o valor do ben non superen os 3.000 euros.

2. Enténdese por microdoazón finalista:a liberalidade ou dación dunha cantidade monetaria ou dun ben, tanxible ou intanxible, sempre que tal cantidade ou o valor do ben non superen os 3.000 euros, destinada a servizos, departamentos, unidades, proxectos, ideas, etc., concretos e propostos polo donante.

3. Enténdese por financiamento colectivo (crowdfunding): a microdoazón monetaria ou dun ben, tanxible ou intanxible, por importe ou valor inferior a 3.000 euros, destinada á realización de ideas ou proxectos concretos propostos pola Universidade na súa condición de donataria.

4. Enténdese por donante:as persoas físicas, membros da comunidade universitaria ou alleas a esta, así como as persoas xurídicas, que fan unha microdoazón por importe inferior a 3.000 euros en favor da Universidade.

Artigo 2.- Establecemento dun procedemento para as microdoazóns

1. A USC creará unha web de uso exclusivo para articular as microdoazóns, onde se porá a disposición dos donantes o formulario que deberán cumprimentar indefectiblemente.

2. No dito formulario deberase indicar:

a) O tipo de microdoazón, é dicir, microdoazón non finalista, microdoazón finalista, ou financiamento colectivo (crowdfunding).

b) O número da conta bancaria para o caso de ingreso en efectivo dunha microdoazón monetaria.

c) Os beneficios fiscais orixinados pola microdoazón.

3. Se a microdoazón fose monetaria, a súa liquidación poderase efectuar directamente na propia web ou na conta bancaria que se indique.

4, Se a microdoazón fose un ben, tanxible ou intanxible, deberá formalizarse a través do correspondente acordo entre as partes, e entregarse dito ben ou o documento da súa titularidade na Vicerreitoría con competencias no ramo, na Xerencia ou na Secretaría Xeral segundo o destino da microdoazón.

5. O donante poderá actuar de forma anónima ou pública. No segundo caso, o donante figurará na web, ademais de poder obter as distincións e recoñecemento que se establezan pola Universidade de Santiago de Compostela.

6. A Universidade de Santiago de Compostela, unha ver verificada a microdoazón, expedirá o correspondente certificado de recepción a efectos de desgravación fiscal. Este certificado poderá realizarse por medios electrónicos.

Artigo 3.- Obxecto

1.As microdoazóns destinaranse preferentemente para aos seguintes ámbitos:

- Actividades de investigación

- Actividades culturais e deportivas

- Actividades de difusión científica

- Achegas de bens mobles inventariables

- Dotación de becas a estudantes con baixos recursos

- Cátedras Universidade- Empresa

2. A enumeración anterior é aberta de modo que os donantes poderán suxerir tamén destinos e obxectivos concretos ou proxectos a impulsar, cuxa viabilidade será estudada pola Vicerreitoría con competencias no ramo, a Xerencia ou a Secretaria Xeral, segundo o caso e con pleno respecto ao disposto no artigo 4.2.

3. Pola súa banda, a Universidade de Santiago de Compostela poderá establecer propostas de proxectos concretos solicitando o seu financiamento colectivo e crear plataformas de crowdfunding ou adherirse ás existentes en coordinación co disposto no artigo 2.3.

4. No caso da non realización do proxecto ou actividade prevista, poderá procederse a devolver o importe recibido agás que o donante opte por financiar outra actividade da Universidade de Santiago de Compostela ou renuncie a súa devolución, co cal a achega non estará adscrita a ningún fin particular.

Artigo 4.- Seguimento

1. En virtude de este acordo, o Consello Social autoriza a Vicerreitoría competente por razón do ramo, á Xerencia e á Secretaría Xeral segundo o caso, á aceptación das microdoazóns, dando conta delas con posterioridade, así como do seu destino.

2. As Vicerreitorías, a Xerencia ou a Secretaria Xeral, segundo o caso, están obrigadas a aceptar as microdoazóns agás que os fines destas foran contrarios aos intereses da Universidade.

3. A expedición do certificado de recepción da microdoazón constituirá o título da súa aceptación.

4. Os donantes terán dereito de acceso ao seguimento dos proxectos financiados mediante as ferramentas que se poñan a súa disposición ou a través das memorias finais dos proxectos, que lles serán remitidas.

Artigo 5.- Distincións honoríficas

O donante figurará na web de uso exclusivo para microdoazóns sen prexuízo doutras distincións ou recoñecemento dos que puidera ser obxecto de conformidade co Regulamento de honras e distincións da Universidade de Santiago de Compostela.

E para que así conste, asino a presente certificación, en Santiago de Compostela, a 30 de novembro de 2016, co Visto e Prace do sr. Reitor.