TÍTULO I. Efectos da asistencia a clase na avaliación

Artigo 1. Sistemas de avaliación

1. A asistencia a clase configúrase como un dereito/deber do estudantado, sendo a programación docente de cada materia a que determina e concreta a súa valoración e establece as actividades formativas obrigatorias.

2. O sistema de avaliación que se estableza na programación docente deberá respectar o disposto na memoria do título e a asistencia a clase poderá ter a seguinte incidencia:

a) Valorarse como un factor máis na avaliación continua.

b) Ponderarse na cualificación final ou parcial, nunha porcentaxe previamente establecida.

c) Ser preceptiva para superar a materia ou para presentarse á realización de exames. Neste caso, na programación da materia deberase indicar a porcentaxe de presencialidade necesaria nas actividades docentes programadas e con anterioridade á realización das probas deberá publicarse un listado do estudantado que satisfaga este requisito para poder examinarse.

d) Non ter ningunha valoración.

3. As faltas de asistencia non poderán puntuar negativamente na nota da proba final de avaliación, pero si se poderán ter en conta na avaliación continua. En todo caso, de realizarse nas sesións de aula actividades que teñan algún tipo de ponderación na cualificación final da materia, o/a estudante que non asista a elas por unha causa xustificada poderá compensar a súa ausencia na forma en que se determine polo profesorado da materia.

4. A falta de asistencia a actividades ordinarias que se realicen de forma síncrona fóra dos horarios establecidos para a materia non terán efectos na avaliación final, sen prexuízo das especificidades que se contemplen na programación docente.

Artigo 2. Acreditación da asistencia a clase

1. O control de asistencia ás actividades programadas como obrigatorias deberá realizarse a través de soportes de carácter duradeiro. A estes efectos poderá establecerse un sistema electrónico mediante unha ferramenta que subministrará información aos centros e comisións académicas, aos departamentos e ao propio estudantado sobre o seguimento das actividades.

2. Cando a programación docente da materia contemple no sistema de avaliación como elemento de valoración a asistencia a clase, e mentres non exista un sistema electrónico, cada profesor/a ou coordinador/a deberá establecer o sistema de control a utilizar. As evidencias dos resultados dos controis de asistencia xunto co resto dos materiais obxecto de avaliación deberán conservarse durante o tempo que indique a normativa vixente.

3. Para o control das prácticas de campo ou daquelas actividades que se realicen en instalacións fóra da USC empregarase o mesmo sistema.

4. A manipulación ou falsificación intencionada dos sistemas de control de asistencia determinará a consideración de non asistencia á actividade e deberá ser comunicada á Reitoría para o inicio das actuacións disciplinarias que puidesen corresponder.

Artigo 3. Xustificación da falta de asistencia a clase

1. O estudantado poderá xustificar a falta de asistencia ás actividades académicas por razóns de índole persoal ou familiar, pola realización de deberes inescusables de carácter social debidamente acreditados ou por causas de forza maior. Cando isto suceda e a xustificación sexa considerada apta e suficiente, a falta de asistencia non implicará consecuencias negativas para a avaliación e cualificación dos e das estudantes, debendo concretarse co estudantado os cambios oportunos para a súa realización dentro do período de planificación académica da materia, sempre que sexa posible.

2. En todo caso, serán causas xustificadas as seguintes:

a) A realización de exames oficiais ou probas selectivas na Administración, xustificada mediante a acreditación do órgano avaliador.

b) A presenza en órganos colexiados universitarios internos, ou externos á USC cando se asista en representación do colectivo, acreditada mediante a correspondente convocatoria e certificación da secretaría do órgano.

c) O ingreso en centros hospitalarios e as consultas médicas non reprogramables, acreditadas con xustificante do centro médico ou facultativo responsable.

d) A enfermidade que impida a presenza física no centro, debidamente acreditada.

e) O paro académico ou a folga doutros colectivos cando impida o acceso ás aulas.

f) A enfermidade grave ou falecemento dun familiar ata o 2º grao, debidamente acreditada.

g) O cumprimento dun deber público, debidamente xustificado.

h) A limitación oficial de mobilidade por inclemencia meteorolóxica ou estado de alerta, alarma ou excepción debidamente declarado.

i) A participación en actividades por parte de deportistas de alto nivel ou de alto rendemento, conforme á normativa autonómica e a da USC.

l) Calquera causa de forza maior debidamente acreditada.

3. A acreditación da existencia de causa xustificada para a non asistencia a clase deberá realizarse ante o profesor ou profesora no prazo máximo de cinco días hábiles desde que remate a causa que impediu a asistencia. De existir discrepancia de criterio entre o/a docente e o/a estudante sobre a acreditación, a decisión final corresponderá á dirección do centro ou comisión competente.

4. Entenderanse cumpridas as obrigas de asistencia ás actividades formativas recollidas na programación docente das materias sen necesidade de aportar xustificación cando a falta de asistencia non supere o 10% das horas programadas, agás nos casos de actividades de realización obrigatoria.

5. No caso de que o control de asistencia se realice por medios electrónicos establecerase o sistema específico de comunicación e xustificación das faltas de asistencia.

Artigo 4. Actividades complementarias

Excepcionalmente poderase xustificar a non asistencia a clase pola realización de actividades formativas de interese institucional para a USC ou que complementen a formación transversal ou específica da titulación. A falta de asistencia poderá autorizarse pola Reitoría no caso de actividades de interese institucional, pola dirección do centro no caso de que se trate de formación transversal ou específica da titulación ou polo profesorado responsable da materia cando se trate de formación relacionada con esta. A ausencia por estas causas non poderá superar o 5% das horas programadas para a materia pero deberá cubrir polo menos unha sesión.

Artigo 5. Falta de asistencia a probas de avaliación

1. As causas de xustificación da non asistencia a clase recollidas no artigo 3.2. poderán alegarse tamén para xustificar a falta de asistencia a probas de avaliación, agás no caso de deportistas de alto nivel e alto rendemento no que só se flexibilizará o calendario de exames cando coincida coas competicións e con concentracións e adestramentos de seleccións oficiais, xustificados mediante certificación da federación deportiva correspondente.

2. De existir causa xustificada o/a estudante terá dereito a realizar a proba noutra data, que se fixará polo profesorado responsable da materia, preferiblemente de forma consensuada co/a estudante afectado/a e sempre con anterioridade á data de peche de actas da correspondente oportunidade. Entre a comunicación da nova data de avaliación e a realización da proba deberá transcorrer, sempre que sexa posible, un mínimo de dous días hábiles.

Artigo 6. Estudantado repetidor

Se un ou unha estudante matriculado nunha determinada materia tivese superados os requisitos de asistencia, na programación docente poderase determinar que se someta ao réxime ordinario ou posibilitar que realice actividades específicas para superar a disciplina sen necesidade de acudir a todas as actividades académicas programadas como obrigatorias. Neste último caso recollerase un sistema de avaliación específico.

TÍTULO II. Valoración das faltas de asistencia a clase

Artigo 7. Análise das faltas de asistencia

1. Os resultados anuais de asistencia a clase por titulación poderán ser obxecto de análise e informe polas comisións do título correspondentes.

2. Se nunha determinada materia se detectase unha falta de asistencia masiva e reiterada, a comisión do título deberá identificar a causa ou causas da falta de asistencia e concretar as medidas de corrección e mellora que considere pertinentes.

3. Se transcorridos tres anos desde a adopción desas medidas non se apreciasen melloras, a situación deberá ser avaliada pola Comisión delegada do Consello de Goberno con competencias na materia, que deberá propoñer novas medidas tendentes a mellorar a situación.

TÍTULO III. Dispensa de asistencia a clase

Artigo 8. Dispensa de asistencia a clase

1. A dispensa de asistencia a clase ten carácter excepcional e só se poderá conceder a falta doutra alternativa viable para cursar estudos en modalidade presencial.

2. As xuntas de centro ou as comisións nas que deleguen poderán conceder a dispensa de asistencia a clase para casos específicos, logo da solicitude e acreditación das causas da petición e cando non impida que se acaden os obxectivos de aprendizaxe e as competencias indicadas na memoria verificada do título.

Artigo 9. Solicitude de dispensa de asistencia a clase

1. Nos estudos de grao e máster o estudantado poderá solicitar ao principio do curso ou do semestre e nas datas establecidas polo centro, ou posteriormente se concorresen causas imprevisibles e sobrevidas, a dispensa de asistencia a clase, mediante a presentación dunha solicitude motivada ante a dirección do centro, que deberá acompañar dos documentos acreditativos que correspondan.

2. O/A estudante poderá solicitar a dispensa de asistencia a clase para a totalidade das materias nas que estea matriculado ou, se a programación docente o permite, para unha parte delas ou para determinadas actividades.

3. Poderase solicitar a dispensa con base nas seguintes causas:

a) Enfermidade grave ou tratamentos médicos inaprazables que impidan a presenza do/a estudante no centro.

b) Embarazo de alto risco, ter menores a cargo de ata 3 anos de idade e coidado de persoas dependentes a cargo ata o segundo grado de consanguinidade ou afinidade, debidamente acreditados.

c) Prestación de servizos por conta allea ou por conta propia debidamente acreditada (alta no Réxime Xeral ou no de Autónomos da Seguridade Social, copia do contrato de traballo ou dos encargos a realizar, copia do recibo de pago da última cotización).

d) Situación de acoso, violencia de xénero ou similar así como supostos de adopción de medidas cautelares ditadas en procesos xudiciais e expedientes disciplinarios.

e) Calquera causa de forza maior debidamente acreditada a xuízo da Xunta de centro ou comisión competente.

Artigo 10. Criterios para a resolución das solicitudes de dispensa de asistencia a clase

1. Para a resolución das solicitudes de dispensa os centros deberán ter en conta os seguintes criterios:

a) A excepcionalidade da medida.

b) A natureza dos estudos que se pretenden cursar, tendo en conta que a dispensa deberá ser denegada cando exista necesidade acreditada de asistencia a certas materias ou actividades, en particular, as de contido fundamentalmente práctico.

c) As posibilidades de adquirir as competencias por sistemas alternativos á asistencia a clase, previa consulta co profesorado responsable se fose necesario.

2. A comisión do título deberá emitir un informe motivado para a resolución das solicitudes de dispensa.

3. A resolución de concesión da dispensa determinará, logo da consulta co profesorado afectado cando sexa necesario, o sistema de avaliación que debe seguirse. Poderase considerar un sistema diferenciado do criterio xeral, que debe permitir acadar a mesma puntuación que ao resto do estudantado.

4. A resolución que se dite deberá comunicarse ás persoas afectadas.

Artigo 11. Alternativas á dispensa de asistencia a clase

1. O/A estudante no que concorra algunha das causas para a solicitude de dispensa deberá solicitar simultaneamente un cambio de grupo, agás que polas súas circunstancias non sexa unha opción viable para el/ela. No caso de non aceptarse o cambio de grupo valorarase a solicitude de dispensa. Terá preferencia o estudantado con obrigas familiares e persoais acreditadas.

2. No caso de que a solicitude de dispensa de asistencia a clase non sexa aceptada o/a estudante, unha vez coñecida a resolución denegatoria, poderá formular ante o Servizo de Xestión Académica unha solicitude extraordinaria de cambio de matrícula nos seus estudos a dedicación parcial. Na resolución desta solicitude teranse en conta os límites fixados respecto ao número máximo de estudantes a tempo parcial na titulación.