CAPÍTULO I. Disposicións xerais

Artigo 1. Obxecto.

Este regulamento ten por obxecto establecer a regulación do persoal directivo profesional da Universidade de Santiago de Compostela e das súas entidades dependentes, o procedemento de provisión de postos directivos e o réxime xurídico aplicable ao persoal que desempeñe eses postos.

Artigo 2. Réxime xurídico.

1. O persoal funcionario de carreira ou laboral fixo das Administracións públicas que ocupe postos directivos profesionais da Universidade de Santiago de Compostela

rexerase polo disposto neste regulamento e polo disposto na Lei 2/2025, do 29 de abril, de emprego público de Galicia.

2. O persoal de entidades dependentes da Universidade de Santiago de Compostela

que non teña a condición de funcionario de carreira ou laboral fixo das Administracións públicas, terá unha relación laboral de alta dirección, de carácter temporal, e rexerase polas cláusulas establecidas no seu contrato e polo disposto no Real decreto 1382/1985, do 1 de agosto, polo que se regula a relación laboral de carácter especial de persoal de alta dirección.

Artigo 3. Ordenación dos postos directivos.

1. Os postos de traballo de persoal directivo profesional da Universidade de Santiago de Compostela incluiranse nunha relación de postos directivos cuxa aprobación e modificación corresponderá ao Consello de Goberno, por proposta da Reitoría, previo informe económico da Xerencia.

2. A relación de postos de persoal directivo profesional será pública e conterá, como mínimo, a seguinte información:

- Código de identificación

- Denominación do posto

- Dependencia funcional

- Localización do posto de traballo

- Forma de provisión

- Grupo e subgrupo de clasificación profesional ao que se asimilen as súas funcións

- Requisitos esixidos para o desempeño do posto e reserva, de ser o caso, a persoal funcionario de carreira

- Retribucións do posto

3. A determinación das condicións de emprego do persoal directivo non terá a consideración de materia obxecto de negociación colectivo de conformidade co previsto nos artigos 13.4.e 37.2.c) do texto refundido da Lei do Estatuto básico do empregado público, aprobado polo Real decreto lexislativo 5/2015, do 30 de outubro, e no artigo 33.5 da Lei 2/2015, do 29 de abril, de emprego público de Galicia.

CAPÍTULO II. Natureza dos postos directivos profesionais

Artigo 4. Postos directivos profesionais.

1. Son postos directivos profesionais os que figuren con tal carácter na correspondente relación de postos directivos.

2. Cualificaranse como postos directivos profesionais os que reúnan as seguintes condicións:

a) Que dependan directa e inmediatamente das persoas titulares dos órganos de goberno da Universidade de Santiago de Compostela ou que realicen tarefas xerenciais no ámbito das entidades dependentes e adscritas da Universidade.

b) Que teñan un alto nivel de autonomía funcional, limitada unicamente polos criterios e instrucións directas dos seus superiores xerárquicos.

c) Que teñan atribuídas funcións directivas e responsabilidades sobre o desenvolvemento de políticas, programas e proxectos e a responsabilidade no cumprimento dos seus obxectivos.

Artigo 5. Funcións.

1. Corresponden aos postos directivos as seguintes funcións:

a) A participación no deseño e a formulación de políticas, programas e proxectos.

b) A planificación, dirección, coordinación, supervisión e avaliación das actividades que se leven a cabo para a execución dos programas ou proxectos que se lle asignen ou a consecución dos obxectivos que se establezan.

c) A dirección, coordinación e supervisión das persoas dos centros ou unidades que estean baixo a súa dependencia, así como dos servizos, medios materiais, e recursos que se lle asignen.

d) A proposta e, se procede, a implantación de medidas de innovación e mellora en relación cos servizos e actividades do seu ámbito competencial.

e) A rendición de contas.

2. Poderán atribuírse aos postos directivos profesionais o exercicio de competencias propias ou delegadas.

Artigo 6. Requisitos.

1. Para desempeñar un posto directivo profesional na Universidade de Santiago de Compostela será necesario ter a condición de persoal funcionario de carreira do subgrupo A1 ou A2 ou persoal laboral fixo dos grupos 1 e 2 da Universidade de Santiago de Compostela e, se así se establece na relación de postos directivos, de calquera Administración pública e non atoparse na situación administrativa de suspensión de funcións ou, de ser o caso, suspensión de emprego e soldo.

2. Nas entidades dependentes e adscritas da Universidade de Santiago de Compostela, con carácter excepcional, poden desempeñar postos directivos profesionais as persoas que non teñan a condición de funcionario de carreira ou persoal laboral fixo de calquera Administración pública, sempre que reúnan os requisitos esixidos para o desempeño do posto directivo.

3. Ademais do anterior, para o acceso á condición de persoal directivo serán necesario acreditar competencias directivas. Para os efectos do previsto neste regulamento entenderase que se posúen competencias directivas en calquera dos seguintes supostos:

a) Estar en posesión da certificación acreditativa de ter superado un curso de formación sobre o desenvolvemento da función directiva impartido pola Universidade de Santiago de Compostela ou por centros de formación acreditados doutras Administracións públicas.

b) Estar en posesión dun mestrado ou título de posgrao, de carácter oficial, sobre dirección pública.

c) Ter desempeñado postos directivos en calquera Administración pública durante, polo menos, dous anos continuados.

4. Na relación de postos directivos poderán incluírse outros requisitos específicos para o seu desempeño como titulacións específicas, idiomas ou outros que se consideren imprescindibles.

5. O persoal directivo profesional deberá acreditar os requisitos xerais previstos no artigo 50 da Lei 2/2015, do 29 de abril, de emprego público de Galicia.

CAPÍTULO III. Provisión de postos directivos profesionais

Artigo 7. Procedemento de provisión.

1. A provisión dos postos directivos profesionais realizarase previa convocatoria pública específica para a cobertura do posto que se publicará no Taboleiro Electrónico da Universidade de Santiago de Compostela e, de ser o caso, noutros medios de difusión que se determinen na convocatoria.

2. A competencia para convocar e resolver os procedementos de provisión de postos directivos profesionais corresponde á Reitoría que poderá nomear unha comisión asesora para levar a cabo a avaliación da documentación presentada e, de ser o caso, das entrevistas que se realicen durante o proceso.

3. A convocatoria incluirá, como mínimo, a seguinte información:

- Indicación das condicións de participación no procedemento de selección.

- Prazo de solicitudes que será, como mínimo, de 10 días hábiles, contados a partir da publicación no Taboleiro Electrónico da Universidade de Santiago de Compostela

- Denominación e código do posto, nivel, xornada, retribucións totais, retribucións variables de ser o caso, localización do posto e centro de traballo.

- Requisitos do posto segundo a relación de postos directivos profesionais.

- Funcións do posto.

- Documentación a presentar xunto coa solicitude.

4. Os requisitos para poder participar nos procedementos de provisión de postos directivos profesionais da Universidade de Santiago de Compostela deberán posuírse no último día do prazo de solicitude previsto na convocatoria e manterse ata a toma de posesión.

Artigo 8. Desenvolvemento da convocatoria de provisión.

1. Unha vez finalizado o prazo de presentación de solicitudes, o órgano de selección previsto na convocatoria procederá a avaliar a idoneidade do perfil profesional das persoas participantes de conformidade cos méritos alegados no procedemento.

2. A convocatoria poderá prever a presentación, xunto coa solicitude, dun proxecto de xestión e a realización dunha entrevista curricular que poderá incluír, de ser o caso, a defensa do proxecto de xestión.

3. Finalizadas as actuacións anteriores, o órgano de selección proporá ao órgano convocante a persoa seleccionada para desempeñar o posto directivo profesional convocado ou a declaración do proceso como deserto por considerar que en ningún dos participantes concorren as condicións de idoneidade para o seu desempeño.

4. O órgano de selección elaborará un informe onde conste o resultado da avaliación realizada, coa indicación das condicións apreciadas na persoa proposta que motiven a súa idoneidade para o desempeño do posto convocado respecto do resto de persoas participantes ou, de ser o caso, as razóns polas que se considera que non concorren as condicións de idoneidade en ningunha das persoas aspirantes.

5. A Reitoría, unha vez recibida a proposta, emitirá unha resolución que porá fin ao procedemento e que será publicada no Taboleiro Electrónico da Universidade de Santiago de Compostela, na que nomeará á persoa proposta ou declarará deserto o procedemento.

6. No suposto de persoal directivo profesional de entidades dependentes que non teña a condición de funcionario de carreira ou persoal laboral fixo de Administracións públicas, a relación formalizarase mediante un contrato laboral de alta dirección.

Artigo 9. Nomeamento e cesamento.

1. Os nomeamentos e cesamentos en postos directivos profesionais que estean ocupados por persoal que teña a condición de persoal funcionario de carreira ou laboral fixo das Administracións públicas serán competencia da Reitoría, que dará conta ao Consello de Goberno.

2. Os contratos de alta dirección das entidades dependentes ou adscritas á Universidade de Santiago de Compostela formalizados ao abeiro desde regulamento incluirán un pacto de permanencia e non competencia poscontractual polos dous anos seguintes á extinción do contrato.

3. O cesamento do persoal directivo profesional producirase por causas obxectivas vinculadas a unha avaliación negativa do seu desempeño, á perda de confianza ou a graves e continuadas dificultades de integración no equipo directivo, apreciadas polo órgano superior xerárquico do que dependa directamente.

4. Ao persoal funcionario de carreira ou laboral fixo da Universidade de Santiago de Compostela removido recoñeceránselle análogas garantías ás previstas para o persoal funcionario que cesa en postos de traballo provistos polo procedemento de libre designación na Lei 2/2015, do 29 de abril, de emprego público de Galicia.

5. No caso do persoal directivo con contrato laboral de alta dirección, serán de aplicación as regras específicas da extinción deste tipo de contrato.

CAPÍTULO IV. Dirección pública profesional

Artigo 10. Avaliación de obxectivos e rendición de contas.

1. O persoal directivo profesional está suxeito á avaliación periódica con carácter anual, de conformidade cos criterios de eficacia e eficiencia, responsabilidade na súa xestión e control de resultados en relación cos obxectivos que lles foran asignados. En todo caso, os obxectivos poderán ser redefinidos en función das políticas que se impulsen en cada momento.

2. A avaliación dos resultados realizarase polo superior xerárquico, tendo en conta os seguintes criterios:

a) Establecemento e avaliación de obxectivos.

b) Deseño, planificación e xestión de proxectos.

c) Xestión de recursos materiais, financeiros, tecnolóxicos e persoais.

3. O resultado desta avaliación determinará:

a) A continuidade no posto que se desempeñe e, de ser o caso, na condición de persoal directivo.

b) A progresión na carreira directiva profesional.

c) De ser o caso, a contía da parte variable da retribución do persoal directivo.

Artigo 11. Retribucións

1. O persoal directivo profesional percibirá as retribucións que se fixen na relación de postos directivos profesionais, en catorce pagas, doce ordinarias e dúas extraordinarias e constarán dunha parte fixa, que virá determinada pola titulación académica, a progresión alcanzada na carreira directiva e as características do posto directivo desempeñado e, de ser o caso, dunha parte variable, que estará vinculada á consecución dos obxectivos fixados.

2. A parte fixa das retribucións do persoal directivo estará integrada por:

a) As retribucións básicas, integradas polo soldo e, de ser o caso, os trienios, así como polos compoñentes destes nas pagas extraordinarias.

O soldo e os trienios do persoal directivo que teña a condición de persoal funcionario de carreira ou persoal laboral fixo corresponderanse aos do subgrupo ou grupo de clasificación profesional, ao que pertenza, ou aos conceptos retributivos equivalentes do persoal laboral. Nos demais casos percibiranse como retribucións básicas exclusivamente o soldo do subgrupo ou grupo de clasificación profesional do persoal funcionario de carreira que corresponda á titulación académica que se posúa.

b) As retribucións complementarias que incluirán un complemento de carreira e outro de posto directivo.

3. O persoal directivo que ostente a condición de funcionario de carreira ou persoal laboral fixo percibirá en concepto de antigüidade os trienios que teña recoñecidos ou lle sexan recoñecidos durante o exercicio das súas funcións pola súa administración de orixe.

4. As contías da retribucións íntegras do persoal directivo profesional experimentarán, en cada exercicio, a actualización prevista nas leis de orzamentos xerais do Estado para o persoal do sector público.

5. O persoal directivo percibirá pagas extraordinarias e indemnizacións por razón de servizo nos termos establecidos polos artigos 138 e 139 da Lei 2/2015, do 29 de abril, de emprego público de Galicia.

6. Durante as situacións de incapacidade temporal ao persoal directivo profesional seranlles de aplicación as previsións do Acordo sobre a xestión e control dos procesos de incapacidade temporal, as ausencias por enfermidade ou accidente que non dean lugar a incapacidade temporal e a incorporación progresiva despois de tratamentos oncolóxicos.

Artigo 12. Réxime disciplinario e incompatibilidades

1. O persoal directivo estará sometido ao réxime disciplinario previsto na Lei 2/2015, do 29 de abril, de emprego público de Galicia para o persoal funcionario, agás nos casos nos que accedeu ao seu posto en virtude de contrato laboral de alta dirección, nos que lle será de aplicación o réxime disciplinario previsto para o persoal laboral.

2. O persoal directivo profesional desempeñará a súa actividade con dedicación exclusiva e estará sometido á normativa de incompatibilidades do persoal funcionario.