O Regulamento para a selección de profesorado con vinculación permanente, aprobado por acordo do Consello de Goberno do 27 de setembro de 2019, e o Regulamento de selección de profesorado non permanente, aprobado en Consello de Goberno de 8 de abril de 2019 e modificado o 7 de febreiro de 2020, establecen nos seus artigos 7.g) e 10.1.e), respectivamente, que o profesorado seleccionado deberá "acreditar o coñecemento das dúas linguas oficiais na Universidade de Santiago de Compostela, de conformidade co establecido na lexislación vixente". O primeiro destes textos precisa que "o coñecemento do español acreditarase mediante un diploma de español como lingua estranxeira de nivel B2 ou superior. As persoas que sexan nacionais de Estados que teñen o español como lingua oficial non terań que acreditar o seu coñecemento. A acreditación do coñecemento do idioma galego farase mediante un diploma Celga3 ou equivalente. A Universidade dispora ́ os medios necesarios para que o profesorado seleccionado que non poida acreditalo inicialmente estea en condicións de facelo no prazo que determine a convocatoria ou, en todo caso, antes de transcorridos dous anos desde a contratación ou nomeamento".

Estas previsións teñen como obxectivo dar cumprimento ao establecido con carácter xeral para o acceso á función pública na comunidade autónoma de Galicia. Ao tempo, en particular no que se refire ao galego, preténdese garantir que o profesorado da Universidade de Santiago de Compostela teña unha competencia inicial suficiente para atender as súas obrigas docentes así como para desenvolverse nunha institución que, de acordo co artigo 3 dos seus Estatutos, define o galego como lingua propia da Universidade de Santiago de Compostela e declara que "potenciará e garantirá, no marco das súas competencias, o uso pleno da lingua galega en todos os ámbitos", así como que "adoptará as medidas necesarias para asegurar o coñecemento suficiente das linguas cooficiais na acollida dos seus membros, co fin de garantir os dereitos lingüísticos de toda a comunidade universitaria".

Co fin de axilizar o proceso de acreditación deste coñecemento, esta Reitoría resolve: