Artigo 1. Obxecto e ámbito de aplicación

Este regulamento ten por obxecto establecer o procedemento de concesión dos premios extraordinarios das titulacións de grao e mestrado oficiais impartidas nas Facultades e Escolas de titularidade da Universidade de Santiago de Compostela.

Artigo 2. Número de premios

O Consello de Goberno da Universidade de Santiago de Compostela poderá outorgar como máximo dous premios extraordinarios por cada grao oficial e un por cada mestrado universitario oficial, con independencia de que a titulación se imparta en un ou varios centros ou campus.

A proposta de concesión do premio extraordinario será realizada polo Centro de adscrición da titulación.

O Centro poderá deixar desertos algúns dos premios e en ningún caso se poderá acumular o número de premios que queden vacantes para futuros cursos académicos.

Artigo 3. Destinatarios

Só poderán ser obxecto de valoración aqueles estudantes que acadaran o grao ou mestrado universitario oficial no precedente curso académico a aquel no que se concede o premio extraordinario. O alumnado que cursara un programa de dobre titulación de grao poderá optar ao premio extraordinario de cada un dos graos que o conforman.

O alumnado que acade a titulación e que teña accedido dende os cursos ponte ou por recoñecemento, adaptación ou validación de estudos, non poderá ser proposto para o premio se supera en máis dun terzo as materias de dita titulación por cursos ponte, ou por recoñecemento, adaptación ou validacións de estudos. Para o alumnado que cursara un programa de dobre grao non computarán a estes efectos os recoñecementos internos entre os dous plans.

Ademais para ser destinatarios dos premios extraordinarios de grao será necesario:

a. No caso de estudantes que realizaron os estudos a tempo completo, telos finalizado no número de cursos académicos establecido na titulación ou, de ser o caso, no programa de dobre titulación.

b. No caso de estudantes que realizaron estudos a tempo parcial, telos finalizado nun prazo máximo de dous cursos académicos a maiores do número de cursos establecidos para a titulación ou, de ser o caso, para o programa de dobre titulación.

Para ser destinatarios dos premios extraordinarios de mestrado universitario oficial será necesario ademais:

a. No caso de estudantes que realizaron os estudos a tempo completo, telos finalizado no número de cursos académicos establecido na titulación.

b. No caso de estudantes que realizaron estudos a tempo parcial, telos finalizado nun prazo máximo do dobre do número de cursos académicos establecido para a titulación.

Artigo 4. Proposta de concesión

Por resolución da Secretaría Xeral abrirase cada curso académico o procedemento para que os centros podan realizar as propostas de concesión dos premios extraordinarios de grao e máster, unha vez sexan definitivas as clasificacións ordenadas das promocións.

O premio recaerá en estudantes que acadaran a máxima ou máximas cualificacións da súa promoción.

O decanato ou dirección do Centro, ben directamente ou ben por encargo da comisión que teña delegada esta competencia, remitirá a proposta definitiva á Secretaría Xeral no prazo que se indique na resolución de apertura do procedemento de concesión dos premios extraordinarios de grao e máster.

Na valoración dos estudos incluiranse todas as materias superadas, tamén o traballo de fin de grao (TFG) e o traballo fin de mestrado (TFM).

Os centros deberán enviar as propostas definitivas dos premios de todas as titulacións adscritas ao mesmo, tanto de grao como de mestrado universitario oficial. A proposta definitiva non poderá exceder do número máximo de premios que se indica no artigo 2, podendo ser inferior a ese tope.

No caso das titulacións impartidas en varios centros ou campus, as propostas definitivas serán enviadas unicamente dende o Centro ao que estea adscrita a titulación.

O premio ou premios deben declararse desertos se os/as estudantes que obteñan os primeiros postos da promoción non acadan unha puntuación media de 8. No entanto, o órgano propoñente poderá realizar propostas cunha puntuación inferior sempre que se motiven axeitadamente.

O Centro emitirá en primeiro termo unha proposta provisoria, que fará pública no Taboleiro Oficial de Anuncios da USC, e contra esta poderán presentarse alegacións no prazo de 10 días dende a súa publicación.

Finalizado o prazo de presentación de alegacións e unha vez valoradas polo Centro, este emitirá a proposta definitiva de concesión, que remitirá á Secretaría Xeral para a súa tramitación ante o Consello de Goberno, xunto cun informe sobre as alegacións recibidas, a valoración destas e a súa incidencia respecto á proposta provisoria. Contra a proposta definitiva de concesión non caberá recurso.

Artigo 5. Concesión dos premios extraordinarios

O Consello de Goberno é o órgano competente para adoptar a decisión sobre a concesión dos premios extraordinarios, en función das propostas presentadas.

O Servizo de Xestión Académica será o encargado de notificar ao interesado a concesión definitiva e incorporalo no seu expediente.

Artigo 6. Recursos

Contra a resolución de concesión dos premios extraordinarios os interesados poderán presentar recurso de reposición perante o Consello de Goberno.

Artigo 7. Efectos

Aos/ás estudantes aos que se lles outorgue o premio extraordinario expediráselles unha certificación conforme ao modelo que estableza a Secretaría Xeral. A primeira certificación non devindicará prezos públicos.

A referida mención incluirase tamén no Suplemento Europeo ao Título (SET) e nas certificacións académicas que se expidan. As expedicións dun novo SET e de novas certificacións académicas devindicarán as taxas que correspondan segundo a normativa aplicable.

O alumnado con premio extraordinario poderá ter outros beneficios e prioridades que lle outorgue a lexislación vixente ou convocatorias específicas respecto a esta distinción.