A Lei de Galicia 3/1983, do 15 de xuño, de normalización lingüística, dispón no seu artigo 10 que os topónimos de Galicia terán como única forma oficial a galega. O mesmo artigo establece no seu apartado 2 que lle corresponde á Xunta de Galicia a determinación dos nomes oficiais dos municipios, dos terrritorios, dos núcleos de poboación, das vías de comunicación interurbanas e dos topónimos de Galicia.

Tendo en conta o Decreto 132/1984, do 6 de setembro, polo que se establece o procedemento para a fixación ou recuperación da toponimia, contando co preceptivo dictame da Comisión de Toponimia, emitido na súa reunión do día un de xullo de mil novecentos noventa e seis, aínda que os topónimos correspondentes ás entidades de poboación que figuran como anexo ó presente decreto xa foron obxecto de aprobación e publicación no Diario Oficial de Galicia, e como consecuencia da corrección dalgún deles, faise necesario aproba-lo nomenclátor correspondente á provincia de Orense como corpo único que recolla a forma oficial das ditas entidades.

Polo exposto, por proposta do conselleiro da Presidencia e Administración Pública e logo de deliberación do Consello da Xunta de Galicia na súa reunión do día vinteseis de xullo de mil novecentos noventa e seis,

DISPOÑO:

Artigo único.-

Queda aprobado o nomenclátor correspondente as entidades de poboación da provincia de Orense que figura como anexo ó presente decreto.