O Regulamento do Persoal Directivo Profesional, aprobado na sesión do Consello de Goberno do 29 de xuño de 2022, entrou en vigor ao día seguinte da súa publicación no Taboleiro electrónico o día 6 de xullo de 2022.

A Resolución Reitoral do 10 de abril de 2026 estableceu a nova estrutura organizativa do equipo reitoral, polo que faise preciso adaptar agora a estrutura directiva aprobada no ano 2022 á organización establecida para o goberno da USC neste novo mandato 2026-2032, que se ven de completar coa Resolución Reitoral de Delegación de Competencias do 8 maio de 2026 (D.O.G. do 20 de maio de 2026). Esta revisión supón unha organización directiva simplificada e máis eficiente, baseada principalmente en unidades con rango de vicexerencias conforme ao artigo 91.2 dos Estatutos da Universidade de Santiago de Compostela, ao tempo que garante e reforza o rango administrativo da Secretaría Xeral da USC e a gobernanza dos servizos de xestión e apoio á investigación e á promoción científica da Universidade.

Cómpre ademais revisar o devandito regulamento en dous aspectos concretos. En primeiro lugar, no que atinxe aos requisitos para o desempeño dun posto directivo profesional na Universidade de Santiago de Compostela, xa que a adquisición da condición de persoal directivo tal e como establece o artigo 34.1 da Lei 2/2015 de 29 de abril de emprego público de Galicia debe basearse nos principios de mérito e capacidade e en criterios de idoneidade, entendidos estes últimos como o conxunto de cualidades, coñecementos e experiencia necesaria que debe reunir unha persoa para ser considerada apta para o desenvolvemento desta función.

O requisito establecido de acreditación de competencias directivas baseada exclusivamente na posesión dunha formación concreta así como a experiencia en determinados postos directivos en calquera administración, sen ter en consideración o desenvolvemento deste tipo de funcións en postos de relevancia na xestión universitaria, fai aconsellable modificar a acreditación das competencias directivas que menciona o artigo 6.3 do dito regulamento, engadindo un suposto máis que permita acreditar competencias baseadas na experiencia contrastada que determina a ocupación de postos técnicos na propia USC.

A segunda modificación que se propón afecta ás causas polas que se pode producir o cesamento do persoal directivo profesional. A Lei de emprego Público de Galicia establece no artigo 34.6 que as causas de cesamento nos postos directivos vincúlanse a avaliación negativa no desempeño, á perda de confianza ou a graves e continuadas dificultades de integración no equipo directivo recoñecendo análogas garantías nestes supostos que para o persoal que fose removido en postos de traballo provistos polo procedemento de libre designación.

Este regulamento non contempla así a posibilidade de establecer como causa de cese a modificación da propia organización do goberno e a dirección da Universidade, causa que obxectiva a necesidade de acompasar a organización e perfil de ocupación dos postos directivos á gobernanza universitaria que en cada momento se adopte, sempre coas mesmas garantías que para o resto dos supostos de cese mencionados. Debe tamén engadirse a posibilidade de que o titular de un posto directivo, por razóns persoais ou causas sobrevidas poida pedir o cese.

Finalmente, co fin de adecuar a Relación de Postos Directivos Profesionais á nova estrutura de goberno da Universidade, proponse a necesaria modificación da mesma, establecendo a posibilidade da súa cobertura por persoal con experiencia directiva noutras universidades públicas, conforme á vixente normativa e doutrina xurisprudencial recaída ao respecto.

Ao abeiro do exposto, e en virtude das competencias atribuídas polos Estatutos da Universidade de Santiago de Compostela no seus artigos 81.c) e 91.2, o Consello de Goberno na súa sesión do 29 de maio de 2026

ACORDOU: