Na Comunidade Autónoma de Galicia, o xogo realizado a través de máquinas vén regulado pola Lei 14/1985, do 23 de outubro, do xogo de Galicia, aprobada polo Parlamento de Galicia en virtude das competencias establecidas no artigo 27.27 do Estatuto de autonomía de Galicia, e está incluído no Catálogo de xogos da Comunidade Autónoma de Galicia aprobado polo Decreto 116/1986, do 4 de xuño. En exercicio da potestade regulamentaria prevista no artigo 22.c) da Lei 14/1985, a Xunta, polo Decreto 39/2008, do 21 de febreiro, aprobou o Regulamento de máquinas recreativas e de azar da Comunidade Autónoma de Galicia.

A organización, celebración ou realización do xogo a través de máquinas de xogo vén gravada pola taxa fiscal sobre o xogo realizado a través de máquinas de xogo, tributo estatal creado polo Real decreto lei 16/1977, do 25 de febreiro, polo que se regulan os aspectos penais, administrativos e fiscais dos xogos de sorte, envite ou azar e apostas.

Polo que respecta á taxa fiscal cómpre sinalar que é un tributo estatal cuxo rendemento está cedido ás comunidades autónomas desde a lei 30/1983, do 28 de decembro, de cesión de tributos do Estado ás comunidades autónomas. Actualmente a norma que rexe a cesión dos tributos estatais ás comunidades autónomas é a Lei 22/2009, do 18 de decembro, pola que se regula o sistema de financiamento das comunidades autónomas de réxime común e cidades con estatuto de autonomía e se modifican determinadas normas tributarias. En virtude das competencias normativas recoñecidas nesta lei, a Comunidade Autónoma de Galicia aprobou mediante o Decreto lexislativo 1/2011, do 28 de xullo, o texto refundido das disposicións legais da Comunidade Autónoma de Galicia en materia de tributos cedidos polo Estado (TRTC), modificado posteriormente polas leis 12/2011, do 26 de decembro, de medidas fiscais e administrativas, 8/2012, do 29 de xuño, de vivenda de Galicia, e 2/2013, do 27 de febreiro, de orzamentos xerais da Comunidade Autónoma de Galicia para o ano 2013. Así, en relación á taxa fiscal sobre o xogo realizado mediante máquinas de xogo, as normas legais aplicables na Comunidade Autónoma de Galicia veñen recollidas no Real decreto lei 16/1977, do 25 de febreiro, polo que se regulan os aspectos penais, administrativos e fiscais dos xogos de sorte, envite ou azar e apostas (respecto ao feito impoñible e ao suxeito pasivo) e no TRTC, no que se regulan o resto dos elementos esenciais do tributo e máis os aspectos de liquidación e pagamento da taxa fiscal sobre xogos de sorte, envite ou azar. O artigo 31, no número 5 do seu punto un, establece que a consellaría competente en materia de facenda poderá dispoñer que as declaracións e/ou autoliquidacións do tributo se efectúen mediante os programas informáticos de axuda que, de ser o caso, se aproben e que, así mesmo, poderá dispoñer a obrigatoriedade da súa presentación e o pagamento mediante medios electrónicos.

As normas regulamentarias de aplicación son:

a) O Real decreto 2221/1984, do 12 de decembro, polo que se regula a taxa fiscal que grava a autorización ou a organización ou a celebración de xogos de sorte, envite ou azar, no que non se opoña ao TRTC e

b) As ordes da consellería competente en materia de facenda seguintes:

i. A do 30 de decembro de 2003, pola que se regula a presentación e o pagamento telemático da taxa fiscal sobre o xogo realizado a través de máquinas de xogo, tipo A especial, B ou C e

ii. A do 25 de febreiro de 2011 pola que se regula a xestión e a presentación e o pagamento presenciais da taxa fiscal sobre o xogo realizado a través de máquinas de xogo tipo A especial, B ou C e se modifica a Orde do 30 de decembro de 2003, pola que se regula a presentación e o pagamento telemático da taxa fiscal sobre o xogo realizado a través de máquinas de xogo tipo A especial, B ou C.

Mediante o Decreto 202/2012, do 18 de outubro, creouse a Axencia Tributaria de Galicia e aprobouse o seu estatuto. A Axencia Tributaria de Galicia terá, entre outras, as funcións de aplicación, revisión e exercicio da potestade sancionadora dos tributos estatais cedidos á Comunidade Autónoma de Galicia. De acordo co disposto no artigo 19 do Estatuto, a Axencia Tributaria de Galicia estrutúrase en áreas e departamentos por razón da materia e en función dos distintos ámbitos de actuación, así como en unidades centrais e delegacións, para o efecto da desconcentración das funcións que así o requiran e de acordo co delimitado por orde da consellería competente en materia de facenda e coas instrucións e directrices emitidas pola Dirección. Máis en concreto, os tributos sobre o xogo pasan a ser xestionados de forma centralizada polo Departamento de Tributos de Xestión Centralizada.

Cómpre sinalar que para esta modalidade do tributo a opción de cumprir as obrigas tributarias dos suxeitos pasivos dun xeito electrónico vén establecida desde hai unha década e cómpre remarcar a aceptación que ten e o éxito do seu funcionamento, que permite nunha única transacción a presentación da autoliquidación da taxa de todas as máquinas con autorización vixente á data do devengo de cada ano, o que fai que sexa preciso estender a dita posibilidade ao longo do todo o ano para o cumprimento das obrigas tributarias tamén nos casos de reinicio da explotación, da expedición de novas autorizacións e para o caso dos trocas das máquinas con modificacións nas súas características.

Estes motivos fan necesaria a promulgación dunha nova orde que recolla a normativa, hoxe dividida en dúas ordes, e que desenvolva os procedementos electrónicos para a presentación de autoliquidacións de calquera carácter durante todo o ano.

A presente orde está estruturada en dous títulos, sete disposicións adicionais, unha disposición transitoria, unha disposición derrogatoria, tres disposicións derradeiras e sete anexos. O primeiro título, denominado «disposicións xerais», contén un artigo que regula o obxecto e ámbito de aplicación da orde. O título II, denominado «obrigas tributarias», divídese en seis capítulos: o capítulo I, composto por 4 artigos, regula as disposicións comúns; o capítulo II, composto por 4 artigos, regula os procedementos para o pagamento e presentación da taxa correspondente ás máquinas en explotación no primeiro trimestre natural do ano; o capítulo III, composto por tres artigos, regula os procedementos para o pagamento e presentación da taxa correspondente ás máquinas de nova autorización ou que reinicien a explotación no resto do ano; o capítulo IV, composto por dous artigos, fai o propio para o suposto de troca de máquinas; o capítulo V, cun artigo que regula o suposto de modificación do prezo máximo regulamentario para a partida de máquinas; e o capítulo VI, composto por tres artigos e que contén as especificacións e normas dos xustificantes de pagamento e presentación de declaracións e autoliquidacións.

Pola súa parte, a orde, mediante as súas disposicións derradeiras primeira e segunda, introduce as modificacións necesarias na orde que regula o pagamento da taxa fiscal sobre o xogo realizado en casinos e na orde de recadación.

En virtude do exposto, de acordo coas competencias normativas que o artigo 50 da Lei 22/2009, do 18 de decembro, pola que se regula o sistema de financiamento das comunidades autónomas de réxime común e cidades con estatuto de autonomía e se modifican determinadas normas tributarias, outorga sobre os aspectos de aplicación dos tributos sobre o xogo, de acordo co establecido no artigo 2 da Lei 17/2010, do 16 de xullo, do réxime de cesión de tributos do Estado á Comunidade Autónoma de Galicia e de fixación do alcance e condicións de dita cesión, e de acordo coa competencia establecida no artigo 31 do texto refundido das disposicións legais da Comunidade Autónoma de Galicia en materia de tributos cedidos polo Estado, aprobado polo Decreto lexislativo 1/2011, do 28 de xullo,

DISPOÑO:

TÍTULO I Disposicións xerais

Artigo 1. Obxecto e ámbito de aplicación

A presente orde ten por obxecto a regulación do cumprimento das obrigas tributarias concernentes á taxa fiscal que grava a autorización, celebración ou organización de xogos de sorte, envite ou azar realizados mediante máquinas de xogo cuxo rendemento corresponda á Comunidade Autónoma de Galicia, e aplicarase a todos os obrigados tributarios da taxa fiscal citada nas súas relacións coa Axencia Tributaria de Galicia.

TÍTULO II Obrigas tributarias

CAPÍTULO I Disposicións comúns.

Artigo 2. Obriga de declaración, presentación e pagamento electrónicos

Os suxeitos pasivos deberán cumprir as obrigas tributarias concernentes á taxa que grava a autorización, celebración ou organización de xogos de sorte, envite ou azar realizados mediante máquinas de xogo a que se refire esta orde, por medios electrónicos. Para isto, deberán empregar as aplicacións informáticas que a Axencia Tributaria de Galicia poña á súa disposición na Oficina Virtual Tributaria (OVT), nas condicións e consonte os procedementos previstos nesta orde.

Artigo 3. Usuarios autorizados

1. Para os efectos do disposto no artigo anterior, as aplicacións informáticas deste tributo poderán ser empregadas polos usuarios que se relacionan a seguir, sempre que sexan previamente autorizados pola Dirección da Axencia Tributaria de Galicia:

a) Os suxeitos pasivos que dispoñan do correspondente certificado de usuario outorgado pola Fábrica Nacional de Moeda e Timbre-Real Casa da Moeda (FNMT-RCM) para a presentación e pagamento dos seus propios tributos, ou doutras autoridades certificadoras admitidas pola consellería competente en materia de facenda, e que previamente fosen autorizados pola dirección da Axencia Tributaria de Galicia para a presentación e pagamento electrónico destes ingresos.

b) Os membros dos colexios profesionais, as entidades privadas, así como as institucións ou organizacións representativas de sectores ou intereses sociais, laborais, empresariais ou profesionais que subscribisen coa Administración tributaria da Comunidade Autónoma de Galicia o correspondente convenio de colaboración, nos termos acordados neste.

2. Os usuarios anteriores, para poderen empregar as aplicacións informáticas sinaladas, deberán presentar ante a Dirección da Axencia Tributaria de Galicia unha solicitude de autorización xunto cunha ficha de usuario, axustadas aos modelos que contén o anexo I, con anterioridade ao primeiro prazo en que deban cumprir as obrigas tributarias referidas a este tributo. Outorgarase a autorización a todos aqueles que reúnan as condicións establecidas no número anterior.

Artigo 4. Aprobación de modelos en formato electrónico

1. Apróbanse os modelos en formato electrónico que figuran nos anexos II, III e IV desta orde e que se relacionan a seguir, para os efectos da aplicación da taxa fiscal que grava os xogos de sorte, envite ou azar, realizado mediante máquinas de xogo:

Modelo D-046. Modelo de declaración de información de máquinas de xogo.

Modelo 045. Modelo de autoliquidación da taxa fiscal do xogo realizado mediante máquinas de xogo.

Modelo 046. Modelo resumo de autoliquidacións pagadas da taxa fiscal do xogo realizado mediante máquinas de xogo.

Cada un dos modelos 045, 046 e D-046 constará de dous exemplares, un para a Administración e outro para o interesado.

2. Os modelos aprobados no número anterior son de uso obrigatorio na Comunidade Autónoma de Galicia para todos os suxeitos pasivos da taxa fiscal sobre xogos de sorte, envite ou azar devengada por máquinas de xogo suxeitas ao pagamento do devandito tributo.

3. Os prazos en que os suxeitos pasivos deberán cumprir as obrigas tributarias ás cales se refire esta orde respecto aos modelos aprobados neste artigo son os seguintes:

a) Prazo 1: do 1 ao 31 de marzo.

b) Prazo 2: do 1 ao 20 de xuño.

c) Prazo 3: do 1 ao 20 de setembro.

d) Prazo 4: do 1 ao 5 de decembro.

Os prazos anteriores entenderanse prorrogados ata o primeiro día hábil seguinte, no suposto de que o último día do período for día inhábil ou sábado.

Artigo 5. Procedemento para a presentación electrónica da declaración da información de máquinas de xogo

1. Durante o prazo 1 establecido no artigo 4, os suxeitos pasivos deberán presentar electronicamente ante a Axencia Tributaria de Galicia unha declaración en que comunicarán os datos correspondentes ás máquinas de xogo das cales eran titulares en 1 de xaneiro do ano en curso, sinalando a situación administrativa en que se encontran nesa data, tivese sido aprobada administrativamente, ou ben solicitada e pendente de aprobación. Igualmente estarán obrigados a comunicar os datos correspondentes a:

a) Máquinas de nova autorización das cales fosen titulares en 31 de marzo, que fosen autorizadas no primeiro trimestre do ano.

b) Máquinas que en 1 de xaneiro estivesen en situación administrativa de baixa temporal e en 31 de marzo estivesen rehabilitadas ou tivesen presentado as solicitudes correspondentes polo reinicio de explotación.

2. Para cumprir o disposto no número anterior, os suxeitos pasivos empregarán o modelo D-046 que conformarán coa aplicación informática que a Axencia Tributaria de Galicia poña á súa disposición na Oficina Virtual Tributaria.

3. Na Oficina Virtual Tributaria os suxeitos pasivos poderán ou ben cubrir directamente o modelo D-046 cos datos correspondentes ou ben incorporar os datos procedentes dun arquivo que terá as especificacións técnicas e o contido que se detallan no anexo V desta orde, consonte o sinalado no número seguinte.

4. Para realizar a carga dos datos procedentes do arquivo a que se refire o número anterior, os suxeitos pasivos deberán empregar a aplicación de subida de arquivos que se habilitará na Oficina Virtual Tributaria. Unha vez transmitido o arquivo, aparecerá a mensaxe «transferencia completada con éxito». O arquivo poderá ser enviado as veces que sexan necesarias, prevalecendo sempre os datos contidos no último arquivo remitido.

5. Unha vez consignados os datos de xeito directo ou incorporados estes despois da transmisión do arquivo, mostrarase o modelo D-046 debidamente cuberto, que debe ser confirmado polo suxeito pasivo, momento en que se lle asignará un número identificativo do modelo.

6. Unha vez confirmado o modelo D-046, o suxeito pasivo deberá proceder á presentación electrónica, de xeito que transmitirá os datos da declaración coa sinatura electrónica, xerada ao seleccionar o certificado previamente instalado para estes efectos no navegador. Se o presentador é unha persoa ou entidade autorizada para presentar declaracións en representación de terceiras persoas, requirirase unha única sinatura, a correspondente ao seu certificado. A presentación do modelo D-046 producirase de xeito simultáneo á presentación a que se refire o artigo 9 e consonte o disposto nel.

CAPÍTULO II Máquinas en explotación no primeiro trimestre natural do ano

Artigo 6. Procedemento electrónico para a realización electrónica da autoliquidación

1. Os suxeitos pasivos deberán presentar no prazo 1 do artigo 4 unha declaración por cada máquina que tivesen en explotación no primeiro trimestre natural do ano e deberán autoliquidar e ingresar a cota anual legalmente establecida que lles corresponda segundo a tipoloxía e as características da autorización da máquina, xa se trate de máquinas autorizadas en anos anteriores ao de devengo, de máquinas con nova autorización que foran autorizadas no primeiro trimestre do ano, ou de máquinas que en 1 de xaneiro estivesen en situación administrativa de baixa temporal e en 31 de marzo estivesen rehabilitadas ou tivese presentado as solicitudes correspondentes polo reinicio de explotación.

A cota anual que se autoliquidará será a que corresponda ao maior número de xogadores e ao maior prezo de partida que amparase a autorización no período comprendido entre a data do devengo e a da presentación da autoliquidación.

2. Para realizar a confección das autoliquidacións, o suxeito pasivo deberá utilizar os datos facilitados pola propia Administración a través da aplicación informática consonte cos datos incorporados por el no modelo D-046.

Para isto empregarán a aplicación informática que a Axencia Tributaria de Galicia poña á súa disposición na Oficina Virtual Tributaria.

3. Os suxeitos pasivos accederán á Oficina Virtual Tributaria e iniciarán a aplicación informática para a confección das autoliquidacións correspondentes. A aplicación informática mostrará o resumo dos datos das máquinas para as cales pretende pagar o tributo e presentar a autoliquidación correspondente, consonte os datos que previamente incorporou no modelo D-046. Se apreciara algún erro ou precisar facer calquera modificación, deberá realizala na aplicación informática. A aplicación informática recalculará a débeda tributaria e mostrará en pantalla o resumo cos novos datos. O suxeito pasivo, para concluír o proceso, deberá confirmalo.

4. A aplicación informática mostrará dun xeito agregado os datos correspondentes ás máquinas cuxa autoliquidación se pretende presentar, co cálculo da débeda tributaria total correspondente e o importe para ingresar. Confirmados os datos polo suxeito pasivo, xerarase o modelo 046, que virá cuberto só no que respecta aos datos anteriores. Este modelo supón a confección de tantos modelos 045 como máquinas agrupe, cubertos cada un deles no que respecta aos datos correspondentes a cada unha das máquinas. Cada unha das autoliquidacións suporá a liquidación e a obriga de ingreso da cota anual legalmente establecida para o exercicio corrente.

5. No caso de que o suxeito pasivo cumpra os requisitos para exercer a opción polo fraccionamento regulada no artigo seguinte e efectivamente optase polo dito fraccionamento, a aplicación mostrará tamén o exercicio da opción polo fraccionamento, o cálculo do número de pagamentos fraccionados e o seu importe, os datos necesarios para a domiciliación dos importes aprazados e o importe para ingresar correspondente aos primeiros pagamentos fraccionados. Confirmados os datos polo suxeito pasivo, xerarase o modelo 046, que virá cuberto só polo que respecta aos datos anteriores. Este modelo supón a confección de tantos modelos 045 como máquinas agrupe, cubertos cada un deles polo que respecta aos datos correspondentes a cada unha das máquinas. Cada unha das autoliquidacións suporá a liquidación da cota anual legalmente establecida para o exercicio corrente, a obriga de ingreso do primeiro dos pagamentos fraccionados trimestrais e a domiciliación dos pagamentos fraccionados trimestrais restantes.

Artigo 7. Opción polo fraccionamento da débeda en pagamentos trimestrais

1. Os suxeitos pasivos, no momento de formularen a autoliquidación, poderán optar polo fraccionamento do importe que se deba ingresar, en catro pagamentos fraccionados trimestrais iguais, ingresando o primeiro deles cando presenten a autoliquidación e aprazando os outros tres para seren ingresados cada un deles nos prazos 2, 3 e 4 sinalados no artigo 4, respectivamente.

2. A opción polo fraccionamento e aprazamento sinalado no parágrafo anterior non precisará de aportación e/ou constitución de garantía ningunha nin devengará xuros de mora.

3. Serán requisitos para poder exercer a opción anterior para cada unha das máquinas:

– Autoliquidar a cota anual vixente que corresponda.

– Presentar a autoliquidación no prazo regulamentariamente establecido.

– Domiciliar os pagamentos fraccionados aprazados.

4. Os suxeitos pasivos, para exerceren a opción a que se refire o número anterior, deberán marcar o recadro de fraccionamento e a aplicación informática determinará o número de pagamentos fraccionados que se aprazan e o seu importe, debendo consignar o suxeito pasivo os datos necesarios para a súa domiciliación, de acordo coas instrucións que se aproban no anexo desta orde.

5. Serán requisitos necesarios para efectuar a domiciliación os seguintes:

a) Que o obrigado ao pagamento sexa titular da conta en que se domicilie este.

b) Que a entidade financeira en que se domicilien os pagamentos preste o servizo de colaboración na xestión recadatoria de tributos cedidos.

c) Que a conta sexa única para todas as máquinas instaladas na data de devengo no ámbito territorial da Comunidade Autónoma de Galicia.

A domiciliación efectuada para un exercicio non terá efectos para o exercicio seguinte.

6. Non será posible aprazar ou fraccionar os pagamentos fraccionados trimestrais. A presentación da solicitude non impedirá o inicio do período executivo nin o devengo das recargas correspondentes e os xuros de mora e considerarase incumprimento das obrigas tributarias para todos os efectos.

7. A falta de ingreso de calquera dos pagamentos fraccionados terá os efectos sinalados na normativa xeral tributaria.

Artigo 8. Procedemento electrónico para o pagamento da débeda tributaria

1. Unha vez xerado o modelo 046 consonte o artigo 6 anterior, o suxeito pasivo deberá proceder ao pagamento da débeda tributaria recoñecida nel.

2. A aplicación informática xerará unha única carta de pagamento por modelo 046, correspondente ás débedas tributarias dos modelos 045 que respalde. Para estes efectos a carta de pagamento que xerará a aplicación acumulará todos os importes para ingresar de cada unha das autoliquidacións correspondentes ás máquinas que o suxeito pasivo vaia presentar na Axencia Tributaria de Galicia. O suxeito pasivo deberá realizar o pagamento da cantidade resultante da carta de pagamento de calquera dos xeitos sinalados neste artigo ou ben marcar no propio modelo 046 que vai solicitar o aprazamento ou o fraccionamento da débeda consonte a normativa xeral tributaria. Neste último caso, deberá presentarse ante a Axencia Tributaria de Galicia unha solicitude expresa de aprazamento ou fraccionamento na forma, lugar e prazo e cos requisitos e consecuencias sinaladas na normativa de aplicación e sen que poida entenderse presentada aquela coa presentación electrónica do modelo 046 e as autoliquidacións que respalda.

3. No caso de que o suxeito pasivo optase polo fraccionamento regulado no artigo 7 desta orde, consonte o disposto nel, a aplicación informática xerará, por modelo 046, unha carta de pagamento que acumulará todos os primeiros pagamentos fraccionados dos modelos 045 que respalde e procesará a domiciliación do resto dos pagamentos fraccionados.

4. Os usuarios poderán ingresar a débeda de calquera das formas seguintes:

a) Mediante ingreso presencial da cantidade correspondente en calquera das entidades colaboradoras autorizadas por esta consellería para o cobramento de autoliquidacións presentadas electronicamente. O ingreso formalizarase mediante a carta de pagamento que para estes efectos xerará a aplicación informática e que previamente deberá imprimir o usuario. Unha vez realizado o pagamento, a entidade colaboradora facilitará un número de referencia completo (NRC) identificativo do ingreso realizado que será requirido posteriormente pola aplicación informática para completar a presentación.

b) Mediante pagamento electrónico. O usuario accederá ás aplicacións específicas a través da páxina web da Axencia Tributaria de Galicia e efectuará o pagamento das correspondentes autoliquidacións que ampara a carta de pagamento a que se refire este artigo a través das entidades colaboradoras autorizadas pola consellería competente en materia de facenda para o pagamento electrónico. A entidade efectuará as comprobacións oportunas e aceptará ou rexeitará o cargo. No caso de ser aceptado o cargo, efectuará o aboamento na correspondente conta restrinxida de recadación de tributos e xerará o correspondente NRC.

5. O número de referencia completo (NRC) a que se refire o número anterior é un código xerado informaticamente pola entidade de depósito mediante un sistema criptográfico que permitirá asociar a carta de pagamento correspondente ás autoliquidacións presentadas simultaneamente por un mesmo suxeito pasivo ao pagamento dela derivado. O NRC está composto por 22 posicións co seguinte contido: posicións 01-13, alfanuméricas, corresponden ao número de xustificante da carta de pagamento a que se refire o número 3 deste artigo; posición 14, alfanumérica, corresponde a un carácter de control adicional; posicións 15-22, carácteres de control. As normas técnicas de xeración do NRC figuran no anexo VI a esta orde.

6. A xeración do NRC pola entidade de depósito implicará:

a) Que o recibo en que figura responde a un ingreso realizado na entidade de depósito que o expide.

b) Que o devandito recibo corresponde ás autoliquidacións incorporadas na carta de pagamento a que fai referencia e non a outra.

c) Que a partir do momento de xeración deste, queda a entidade de depósito obrigada fronte á Facenda da Comunidade Autónoma polo importe que figura na devandita carta de pagamento, e o contribuínte, liberado da súa obriga de pagamento fronte á citada Facenda.

7. Unha vez xerado o correspondente NRC, salvo que sexa anulado consonte a normativa tributaria en materia de recadación, non se admitirá a retrocesión do pagamento por parte da entidade de depósito, debendo presentar o suxeito pasivo, de ser o caso, ante a Axencia Tributaria de Galicia, as correspondentes solicitudes de devolución de ingresos indebidos adecuadamente fundamentadas. Pola súa parte, a entidade de depósito deberá realizar o pagamento na conta restrinxida de recadación con carácter previo á xeración do citado NRC.

8. Unha vez realizado o ingreso resultante da carta de pagamento, a entidade colaboradora devolverá ao interesado, debidamente validado, o exemplar correspondente, que servirá como xustificante do ingreso realizado e, de ser o caso, da orde de débeda en conta dos pagamentos domiciliados. Polo que respecta aos pagamentos fraccionados trimestrais aprazados, a entidade financeira colaboradora procederá a cargar o importe de cada carta de pagamento na conta designada para tales efectos polo contribuínte o último día de cada un dos prazos 2, 3 e 4 sinalados no artigo 4, ingresándoo inmediatamente na conta restrinxida para a recadación de tributos que corresponda, entendéndose realizado o pagamento na devandita data, sen que caiba a retrocesión posterior do aboamento efectuado.

Artigo 9. Procedemento electrónico para a presentación electrónica das autoliquidacións

1. Unha vez realizado ou ben o pagamento da débeda total ou marcada no modelo 046 a solicitude de aprazamento, ou ben o pagamento da débeda correspondente aos primeiros pagamentos fraccionados trimestrais e domiciliado o resto, para concluír co proceso, o usuario deberá proceder á presentación do modelo 046 electronicamente, de xeito que transmitirá os datos contidos nel coa sinatura electrónica, xerada ao seleccionar o certificado previamente instalado para estes efectos no navegador ou en tarxeta. Se o presentador é unha persoa ou entidade autorizada para presentar declaracións en representación de terceiras persoas, requirirase unha única sinatura, a correspondente ao seu certificado. A presentación do modelo 046 suporá a presentación dunha autoliquidación por cada unha das máquinas amparadas pola súa correspondente autorización que o suxeito pasivo determinase na aplicación informática e máis a presentación do modelo D-046 empregado para a confección daqueles.

2. Se a presentación electrónica é aceptada, a aplicación devolverá ao usuario en pantalla o modelo 046 debidamente cuberto, co seu número de identificación, cos datos declarados, os modelos 045 coas autoliquidacións de cada débeda tributaria, cos datos correspondentes ao ingreso realizado, de ser o caso, así como o modelo D-046, debidamente cuberto cos datos declarados e validados cada un deles cun código seguro de verificación (CSV) formado por dezaseis caracteres, con indicación da data de presentación. Estes modelos, serviranlle de xustificante da presentación dos números da declaración e das autoliquidacións impresos nel na data sinalada no propio modelo e do seu pagamento, de ser o caso.

No suposto de que a presentación sexa rexeitada, mostrarase en pantalla a descrición dos erros detectados. Neste caso, o usuario deberá proceder a emendalos mediante a aplicación informática. Se o rexeitamento da presentación for orixinado por un motivo non emendable, o usuario deberá repetir a presentación.

3. O usuario deberá conservar a declaración e as autoliquidacións aceptadas e validadas cos correspondentes códigos seguros de verificación.

CAPÍTULO III Máquinas de nova autorización ou que reinicien a explotación no resto do ano

Artigo 10. Procedemento para a presentación electrónica da declaración de información de máquinas de xogo

1. Os suxeitos pasivos deberán presentar electronicamente ante a Axencia Tributaria de Galicia unha declaración en que comunicarán os datos correspondentes ás máquinas de nova autorización ou que na data do 1 de xaneiro se atopasen en situación de baixa temporal e se pretenda dalas novamente de alta, sempre que a data de efectos da autorización ou alta sexa posterior ao 31 de marzo do ano corrente.

2. Os suxeitos pasivos que reinicien a explotación da máquina no segundo ou no terceiro trimestre natural do ano en curso, poderán acollerse ao réxime de reinicio de explotación de tempada, de xeito que manteñan a máquina en explotación como máximo ata a fin do terceiro trimestre. Para poder acollerse a este réxime, deberán cumprirse os seguintes requisitos:

– Que a máquina se atope na situación de suspensión provisional no 30 de setembro do ano anterior.

– Que o suxeito pasivo exerza a opción por este réxime de acordo coas instrucións que se aproban no anexo desta orde.

– Que a autoliquidación sexa presentada en prazo.

3. Para cumprir o disposto nos números anteriores, os suxeitos pasivos empregarán o modelo D-046, que conformarán coa aplicación informática que a Axencia Tributaria de Galicia poña á súa disposición na Oficina Virtual Tributaria e seguirán o procedemento regulado no artigo 5.

4. A declaración presentarana de xeito simultáneo á presentación das autoliquidacións a que se refire o artigo seguinte e consonte co disposto nel.

Artigo 11. Procedemento electrónico para a realización electrónica da autoliquidación, para o seu pagamento e a súa presentación

1. Os suxeitos pasivos, unha vez confeccionada a declaración mediante o modelo D-046, deberán presentar no primeiro dos prazos sinalados no artigo 4 que estivese operativo, unha declaración por cada máquina en explotación de nova autorización ou da cal se reinicie a explotación, e deberán autoliquidar e ingresar a cota anual legalmente establecida que lles corresponda segundo a tipoloxía e as características da autorización da máquina consonte o que se especifica nos números 2 e 3 deste artigo, salvo que se encontrase na situación regulada no artigo seguinte, caso en que, procederá como se sinala nel. Se o último destes prazos tiver expirado, deberá presentarse a declaración a que fai referencia este número, con carácter previo á data de autorización ou alta.

2. A cota anual que deberán autoliquidar os suxeitos pasivos será:

a) O 75 % da cota anual, se a data de efectos de autorización ou alta se produce no segundo trimestre natural do ano.

b) O 50 % da cota anual, se a data de efectos de autorización ou alta se produce no terceiro trimestre natural do ano.

c) O 25 % da cota anual, se a data de efectos de autorización ou alta se produce no cuarto trimestre natural do ano.

A cota anual que se autoliquidará será a que corresponda ao maior número de xogadores e ao maior prezo de partida que amparase a autorización no período comprendido entre a data de efectos e a da presentación da autoliquidación.

3. Cando o suxeito pasivo reinicie a explotación da máquina no segundo ou no terceiro trimestre natural do ano en curso coa intención de explotala como máximo ata a fin do terceiro trimestre, a cota tributaria será:

– O 50 % da cota anual que corresponda segundo a tipoloxía e características da máquina, se o reinicio da explotación ten efectos para o segundo e o terceiro trimestre.

– O 25 % da cota anual que corresponda segundo a tipoloxía e características da máquina, se o reinicio da explotación ten efectos para un só trimestre.

En todos os casos, a cota anual que se autoliquidará será a que corresponda ao maior número de xogadores e ao maior prezo de partida que amparase a autorización no período comprendido entre a data de efectos e a da presentación da autoliquidación.

4. Para realizar a confección das autoliquidacións que correspondan, seguirase o procedemento establecido no artigo 6 desta orde.

5. Os suxeitos pasivos a que se refire o número 2 deste artigo poderán optar no momento de formular a autoliquidación polo fraccionamento trimestral da cota tributaria que se deba ingresar, cos mesmos requisitos, obrigas e formalidades sinalados no artigo 7. O importe do pagamento trimestral será o resultado de dividir a cota tributaria polo número de trimestres naturais que resten do ano, incluíndo o trimestre da data de efectos.

6. Os suxeitos pasivos a que se refire o número 3 deste artigo poderán optar no momento de formular a autoliquidación, se o reinicio da explotación tiver efectos para dous trimestres, polo fraccionamento trimestral e aprazamento a que se refire o artigo 7, cos mesmos requisitos, obrigas e formalidades sinaladas nel, e tendo en conta que o número de pagamentos trimestrais aprazados, de ser o caso, será un.

7. Unha vez xerado o modelo 046 que corresponda, o suxeito pasivo deberá proceder ao pagamento da débeda tributaria recoñecida nel, segundo o procedemento regulado no artigo 8 desta orde. O obrigado tributario deberá ingresar os pagamentos fraccionados corrente e, de ser o caso, o vencido no momento da confección e presentación da autoliquidación, e os subseguintes cargaranse o último día de cada prazo que proceda na conta indicada para a domiciliación, consonte o sinalado no artigo 8 desta orde.

8. Unha vez concluída a fase anterior, o suxeito pasivo deberá proceder á presentación do modelo 046 consonte o procedemento regulado no artigo 9 desta orde.

Artigo 12. Procedemento electrónico para a realización electrónica da autoliquidación, para o seu pagamento e a súa presentación para a prolongación da explotación da máquina no réxime de reinicio de explotación de tempada

Se o suxeito pasivo, unha vez exercida a opción polo réxime de reinicio de explotación de tempada, decide manter a máquina en explotación máis alá da data comprometida, deberá presentar, no primeiro dos prazos do artigo 4 que estea operativo unha declaración complementaria do modelo D-046 e unha complementaria do modelo 045, autoliquidando e ingresando o importe total da diferenza entre a cota anual que proceda e a xa autoliquidada, seguindo para cada procedemento o disposto nos artigos desta orde que correspondan en cada caso.

CAPÍTULO IV Troco de máquinas

Artigo 13. Procedemento para a presentación electrónica dunha declaración complementaria á declaración da información de máquinas de xogo como consecuencia dun troca

1. O suposto de troca de máquinas autorizado non suporá novo devengo da taxa.

2. O suxeito pasivo deberá presentar electronicamente ante a Axencia Tributaria de Galicia unha declaración complementaria mediante o modelo D-046, na cal porá de manifesto a troca da máquina ou máquinas, no caso de que a máquina que viña substituír a trocada teña un número de xogadores ou un prezo de partida diferente aos da máquina substituída. Para isto seguirase o procedemento sinalado no artigo 5 desta orde.

3. A declaración presentarana de xeito simultáneo á presentación da autoliquidación ou autoliquidacións a que se refire o artigo seguinte.

Artigo 14. Procedemento electrónico para a realización electrónica da autoliquidación, para o seu pagamento e a súa presentación

1. No caso de que a máquina que veña substituír a trocada teña un número de xogadores ou un prezo de partida superior aos da máquina substituída, o suxeito pasivo, unha vez confeccionada a declaración complementaria mediante o modelo D-046, deberá presentar no primeiro dos prazos sinalados no artigo 4 que estea operativo unha autoliquidación complementaria da/s que presentase no seu momento e ingresar o importe que corresponda. Se o último destes prazos tiver expirado, deberá presentarse a autoliquidación a que fai referencia este número, con carácter previo á data de autorización da troca.

2. Para cumprir coa obriga anterior o obrigado tributario deberá declarar a cota anual que corresponda segundo o disposto no seguinte parágrafo e, ao mesmo tempo, autoliquidará o importe total da diferenza entre a nova cota anual e a/s autoliquidada/s con anterioridade para esa autorización ao longo do ano en curso.

No suposto de que a data de efectos da autorización da troca corresponda ao segundo, ao terceiro ou ao cuarto trimestre, a cota anual calcularase mediante a suma do 75 %, do 50 % ou do 25 % respectivamente, da cota correspondente ao maior número de xogadores e maior prezo de partida autorizado durante o período que corresponda, e do 25 %, do 50 % ou do 75 % respectivamente, da cota correspondente ao número de xogadores inferior ao anterior e/ou prezo de partida inferior, amparados pola autorización durante o resto do ano.

3. Para realizar a confección da autoliquidación seguirase o procedemento establecido no artigo 6 desta orde.

O obrigado tributario poderá optar, no momento de formular a autoliquidación, polo fraccionamento trimestral da cota tributaria que se deba ingresar, cos mesmos requisitos, obrigas e formalidades sinalados no artigo 7. Neste caso o obrigado tributario calculará o número de pagamentos fraccionados, que serán respectivamente tres, dous ou un, segundo a data de efectos da troca corresponda ao segundo, terceiro e cuarto trimestres. O importe do pagamento trimestral será o resultado de dividir a cota tributaria polo número de trimestres naturais que resten do ano, incluíndo o trimestre da data de efectos.

4. Unha vez xerado o modelo 046 que corresponda, o suxeito pasivo deberá proceder ao pagamento da débeda tributaria recoñecida nel, segundo o procedemento regulado no artigo 8 desta orde. O obrigado tributario deberá ingresar os pagamentos fraccionados corrente e, de ser o caso, o vencido no momento da confección e presentación da/s autoliquidación/s, e os subseguintes cargaranse o último día de cada prazo que proceda na conta indicada para a domiciliación, consonte o sinalado no artigo 8 desta orde.

5. Unha vez concluída a fase anterior, o suxeito pasivo deberá proceder á presentación do modelo 046 consonte o procedemento regulado no artigo 9 desta orde.

CAPÍTULO V Modificación do prezo máximo regulamentario para a partida de máquinas

Artigo 15. Procedemento para a realización electrónica da autoliquidación, para o seu pagamento e a súa presentación

1. Os suxeitos pasivos que teñan máquinas en explotación deberán presentar unha autoliquidación complementaria das que tivesen presentada/s, no caso de modificación regulamentaria do prezo máximo autorizado para a partida, sempre que:

– A autorización que ampara a súa explotación teña data de efectos anterior á data en que entre en vigor a norma pola que se estableza a modificación regulamentaria do prezo máximo autorizado para a partida.

– A máquina amparada pola autorización fose homologada cun prezo inferior ao novo prezo máximo autorizado.

– Tivesen presentado a/s autoliquidación/s correspondente/s ao ano en curso.

2. A cota anual que deberá autoliquidar o suxeito pasivo será o 75 %, o 50 % ou o 25 % da diferenza da cota que corresponda, segundo que a modificación entrase en vigor no segundo, terceiro ou cuarto trimestre natural do ano respectivamente.

3. O prazo para confeccionar a autoliquidación, pagala e presentala será o primeiro dos prazos sinalados no artigo 4 que se abra a partir do día en que entre en vigor a modificación do prezo máximo regulamentario autorizado.

4. Para a confección da autoliquidación, o seu pagamento e a súa presentación seguiranse os procedementos regulados nos artigos 6, 8 e 9 desta orde de acordo coas instrucións que se aproban no anexo desta orde.

CAPÍTULO VI Xustificantes de pagamento e presentación de declaracións e autoliquidacións

Artigo 16. Consulta de declaracións e autoliquidacións na Oficina Virtual Tributaria

1. Os usuarios a que se refire o artigo 3 poderán en calquera momento acceder á Oficina Virtual Tributaria, no seu horario de dispoñibilidade, para cumprir as obrigas tributarias a que se refire esta orde.

2. Os usuarios deberán acceder na sección «Declaración de tributos» á aplicación informática denominada «Aparellos». Unha vez nela, poderán acceder ás diferentes declaracións, segundo a súa tipoloxía, para comezar unha operación ou para continuala. Para estes efectos cada unha das declaracións mostrará o estado de situación en que se encontra.

3. Os estados de situación poden ser:

a) Borrador: é o estado en que se encontra a declaración D-046 cando foi confeccionada e gardada sen ser presentada.

b) Pendente de pagamento e presentación: é o estado en que se encontra o modelo 046 cando for confirmado polo suxeito pasivo mais non foi realizada ningunha das fases posteriores de pagamento nin de presentación.

c) Pendente de pagamento: é o estado en que aparece o modelo 046 confirmado polo suxeito pasivo e a débeda que figura no modelo foi tramitada para o seu pagamento presencial segundo o establecido no artigo 8.4.a) mais o suxeito pasivo non concluíu a transacción de pagamento.

d) Pendente de presentación: é o estado en que aparece o modelo 046 validado polo suxeito pasivo cando a débeda que figura no modelo foi pagada ou foi marcado o recadro de aprazamento, consonte o disposto no artigo 8, mais aínda non foi presentado.

e) Presentado: estado en que aparece o modelo 046 cando o suxeito pasivo validou o modelo, procedeu pagar a débeda tributaria ou a marcar o recadro de aprazamento e presentou electronicamente o modelo ante a Axencia Tributaria de Galicia.

Artigo 17. Xustificantes do pagamento e da presentación de autoliquidacións e xustificantes da presentación de declaracións de forma electrónica

1. Unha vez que o usuario opte polo pagamento de forma presencial na entidade colaboradora das autoliquidacións abranguidas na carta de pagamento xerada pola aplicación, a aplicación informática xerará dúas copias da carta de pagamento a que se refire o artigo 8.4.a) desta orde debidamente cubertas cos datos que o suxeito pasivo facilitou na aplicación informática. Co devandito documento acudirase á entidade colaboradora para a realización do pagamento, a cal quedará co exemplar para a entidade colaboradora e devolverá ao contribuínte o exemplar para o interesado co selo da entidade, data do ingreso, número e importe, así como co NRC. O devandito documento servirá de xustificante de pagamento das autoliquidacións correspondentes ás máquinas que se relacionan no anexo á carta de pagamento.

2. Se o usuario optar polo pagamento electrónico, a aplicación informática, unha vez realizado o pagamento, xerará o «Recibo de cargo en conta», que o contribuínte deberá conservar, no cal se identificará o número da conta que realiza o pagamento, a data do ingreso, o importe, o NIF e o nome do contribuínte, así como o NRC. O devandito documento servirá de xustificante de pagamento do número da carta de pagamento impreso nel.

3. A presentación das declaracións que regula esta orde e a súa data acreditaranse mediante a impresión dos documentos (modelos D-046, 046 e 045) xerados pola aplicación informática nos cales constarán os datos identificativos do suxeito pasivo e das máquinas declaradas, e do suxeito pasivo, da autorización da máquina de xogo correspondente, da liquidación da cota anual vixente e máis do seu ingreso ou, no caso de exercerse a opción polo fraccionamento, do exercicio da opción de fraccionamento e aprazamento, e do ingreso do primeiro pagamento fraccionado e dos datos dos restantes pagamentos fraccionados domiciliados. Ademais xerarase un código interno que permitirá asociar de forma inequívoca as declaracións presentadas electronicamente coas impresas polo contribuínte. Este documento acreditará a presentación das autoliquidacións, así como a súa data.

4. Os xustificantes de pagamento e presentación sinalados nos parágrafos anteriores producirán os efectos liberatorios para coa Facenda da Comunidade Autónoma sinalados no Regulamento xeral de Recadación. Os suxeitos pasivos deberán conservar os xustificantes de pagamento e presentación. No caso de que a autoliquidación non de lugar a ingreso, bastará a xustificación da presentación na forma sinalada no número 3 anterior. No caso de solicitar aprazamento ou fraccionamento, será necesario, ademais, o xustificante da presentación da solicitude de aprazamento ou fraccionamento.

Artigo 18. Distintivo que acredita a confección, pagamento e presentación da autoliquidación

1. Apróbase o modelo de distintivo acreditativo a que se refire a presente orde e que será o que figura no anexo VII.

2. Os distintivos que acreditan a confección, pagamento e presentación das autoliquidacións correspondentes a cada máquina poranse á disposición dos suxeitos pasivos a través da Oficina Virtual Tributaria, desde o momento en que se verificase a presentación de cada unha delas.

3. O distintivo acreditativo deberá adherirse á máquina no prazo dos quince días seguintes á finalización do prazo da presentación da correspondente autoliquidación e deberá permanecer adherido ata a súa substitución por outro novo.