Resolución da Xerencia do 29 de maio de 2026 sobre xestión orzamentaria coa nova estrutura de órganos de Goberno
NORMA CONSOLIDADA
Por resolución reitoral do 10 de abril de 2026, determinouse o número e a denominación das vicerreitorías da Universidade de Santiago de Compostela (USC), logo da publicación do Decreto 26/2026, do 6 de abril, de nomeamento da reitora dando así publicidade á estrutura do novo equipo de goberno da USC.
O 20 de maio de 2026 publicouse a Resolución de 8 de maio de 2026 pola que se delegan competencias en determinados órganos universitarios, derrogando a Resolución reitoral do 21 de abril de 2022 pola que se delegan competencias en determinados órganos universitarios.
O 29 de decembro de 2025 publicouse no Taboleiro electrónico da USC a Resolución do Xerente da USC, de 29 de decembro de 2025, de prórroga do orzamento para o exercicio económico 2026.
O artigo 18.1 do Regulamento de xestión orzamentaria da USC (en diante, o Regulamento) establece que para determinar a estrutura orzamentaria atenderase á organización existente en cada momento na USC.
Así mesmo, o artigo 20.3 establece que a clasificación orgánica imputará o gasto en función da estrutura organizativa que o xestione, tendo en conta a codificación establecida para as unidades de gasto en que estea organizada a USC en cada momento.
O artigo 47 do Regulamento indica que se configuran como unidades de gasto as estruturas organizativas da USC e o artigo 48 establece a competencia de execución do gasto, nas fases de autorización, disposición e conformidade de gasto, ás persoas que ocupen a dirección das unidades de gasto.
Nos orzamentos vixentes determinadas partidas orzamentarias están asignadas a códigos orgánicos correspondentes á estrutura de órganos de goberno anterior, vixente ata o 9 de maio de 2026. Para os efectos de facilitar a xestión orzamentaria, considerase axeitado manter transitoriamente durante o exercicio 2025 a estrutura de partidas orzamentarias coa codificación orgánica preexistente, sen prexuízo de que, en aplicación da nova estrutura organizativa e do establecido na Resolución pola que se delegan competencias, a xestión dun mesmo código orgánico corresponda a diferentes órganos de Goberno.
Por todo o anterior, esta xerencia no uso das súas atribucións
RESOLVE:
Primeiro.
A xestión orzamentaria das partidas actualmente dotadas nos orzamentos da USC continuará realizándose coa mesma codificación orgánica, funcional e económica.
Segundo.
A codificación orgánica dos créditos orzamentarios que se aproben a partir da entrada en vigor desta resolución será conforme á estrutura organizativa actualmente vixente.
Terceiro.
Sen prexuízo do código orgánico asignado, a competencia para a execución do gasto corresponderá as/os directoras/es de unidades de gasto de conformidade co establecido na Resolución do 8 de maio de 2026 de delegación de competencias.
Cuarto.
As unidades de asuntos económicos continuarán realizando a tramitación das mesmas partidas que actualmente teñen asignadas.
Disposición transitoria
O disposto nesta resolución terá vixencia dende o día seguinte ao da súa publicación no Taboleiro electrónico da USC ata a entrada en vigor dos orzamentos da USC para o ano 2027.
O xerente
Juan Manuel Díaz Villoslada
Este documento es de carácter informativo y no tiene valor jurídico. Está elaborado únicamente a partir de las normas publicadas en Lex.gal. Consulte la información contenida al respeto en la sección de preguntas frecuentes.
Volver