Exposición de motivos

Incorpórase a data na que foi asinado o convenio entre a Universidade de Santiago de Compostela e o Concello de Lugo para a xestión do Museo.

Título I

Artigo 1, apartados 2 e 3. Engádese unha precisión para aclarar a natureza dos fondos, pasando a ter a seguinte redacción:

2. O patrimonio do MDM está constituído polo conxunto de materiais depositados pola Xunta de Galicia, obtidos logo da escavación realizada para a restauración, acondicionamento e posta a punto do edificio coñecido co nome de Pazo de Montenegro, na cidade de Lugo, e que figuran no inventario que acompaña ao presente Regulamento.

3. O MDM conservará todos os fondos que o integran, así como aqueles obtidos como resultado de posteriores investigacións e escavacións no mesmo espazo, mediante a oportuna resolución da Administración competente en materia de patrimonio cultural. A conservación da colección incluirá todos aqueles aspectos referidos ao mantemento, restauración dos exemplares e actualización da súa análise científica.

Artigo 2, apartado 3.3. Engádese unha liña para aclarar o ámbito científico das actividades, quedando redactado como segue:

3.3. As actividades estarán dirixidas aos e ás estudantes, aos e ás docentes e investigadoras/investigadores, e en xeral a todas aquelas persoas que se interesen polo mundo romano.

Título II

Artigo 3, apartados 1 e 2.3. Modifícanse substituindo a mención subdirector/subdirectora por director científico/directora científica, quedando a súa redacción como segue:

1. O equipo de dirección estará formado polo director ou directora e mais o/a director científico/directora científica, nomeados e cesados polo reitor ou reitora entre o profesorado doutor con vinculación permanente na USC, por un prazo de catro anos. A proposta de nomeamento partirá da comisión asesora do MDM.

2.3. Os compoñentes do equipo de dirección do MDM (director ou directora e director científico/directora científica). Este último actuará como secretario ou secretaria da Comisión.

Artigos 4 e 5. Modifícanse, distribuíndo as funcións do director ou directora e do director científico ou directora científica, quedando redactados do seguinte xeito:

Artigo 4. Funcións do director ou directora do MDM

2. Serán as súas funcións:

2.1. Representar o MDM en todas aquelas instancias en que sexa pertinente.

2.2. Elaborar un plan de actuacións de carácter anual ligado ao orzamento do museo.

2.3. Dispoñer os gastos e ordenar os pagamentos necesarios para a execución do orzamento asignado.

Artigo 5. Funcións do director científico ou directora científica

1. Serán as súas funcións:

1.1. Adoptar as medidas necesarias para a conservación, custodia e divulgación das coleccións.

1.2. Dirixir e xestionar todas as actividades científicas relacionadas coas coleccións do Museo.

1.3. Realizar cando menos un informe anual sobre a situación do MDM e ademais aqueloutros que lle solicite o reitor ou reitora da USC ou o vicerreitor ou vicerreitora con competencias sobre o museo, ou o director ou directora.

1.4. Fomentar a política de intercambios, exposicións, doazóns ou depósitos.

1.5. Calquera outra función relacionada co MDM e que non estea expresamente atribuída a outro órgano universitario.

1.6. Todas aquelas das recollidas no artigo 4 nas que o director ou directora delegue na súa figura.

1.7. Facer de secretario das reunión da comisión asesora.

Artigo 6, apartados 6.1.6. e 6.4. Substitúese a mención subdirector/ subdirectora por director científico/directora científica, quedando redactados do seguinte xeito:

6.1.6. Na finalización do mandato do equipo de dirección do MDM, elevar ao reitor ou reitora unha proposta para o nomeamento de director ou directora, e de director cientifico/directora científica, para os seguintes catro anos.

6.4. Entenderase validamente constituída a Comisión asesora cando concorran en primeira convocatoria o presidente ou presidenta, o director científico/directora científica, que actúa como secretario/a, e cando menos a metade dos membros. En segunda convocatoria a constitución será valida se están presentes ademais da persoa que presida e da que faga de secretario, un terzo dos membros.

Título V

Artigo 9. Modifícase a redacción, quedando como segue:

O persoal do MDM encargarase do rexistro dos novos obxectos museísticos que teñan entrada no Museo, así como da súa posterior catalogación e conservación.

Artigo 10, apartado 2. Modifícase a redacción, quedando como segue:

2. As consultas e os préstamos de fondos das coleccións solicitaranse á Dirección do MDM, que os tramitará coa administración competente en materia de patrimonio cultural, que deberá autorizalos segundo a normativa vixente. De seren autorizados os préstamos, rexistraranse:a súa saída, nova localización, tempo de permanencia, responsable temporal e outras circunstancias necesarias para garantir a súa conservación e devolución. Dadas as características do tipo e cantidade de fondos existentes no MDM, os préstamos estarán condicionados á necesidade de funcionamento do propio Museo.

Artigos 12 e 13. Modifícase a súa redacción para facela máis precisa, quedando como segue:

Artigo 12. Baixas.

Os fondos museísticos da colección do MDM poden causar baixa por extravío, destrución ou deterioro irreparable. Os exemplares nestas circunstancias serán rexistrados como baixa no inventario do MDM.

Artigo 13. Altas.

Serán rexistrados como altas no catálogo xeral do MDM todos os novos obxectos que se incorporen á súa colección, ben sexa como resultado de novas escavacións ben por doazóns ou depósitos. Con esta finalidade aplicarase o Procedemento de Xestión Patrimonial e disposicións complementarias da USC.