TITULO PRELIMINAR

Artigo 1.

A Facultade de Humanidades é o centro encargado da xestión e organización no Campus de Lugo dos estudios conducentes á obtención dos títulos de licenciado en Humanidades e licenciado en Filoloxía Hispánica. Tamén se impartirá na Facultade o programa de doutoramento en Humanidades, así como aqueloutros estudios de calquera nivel que se programen de acordo ca normativa vixente.

Artigo 2.

A Facultade ten as seguintes funcións, segundo o establecen os Estatutos da Universidade de Santiago:

1) A elaboración dos programas de estudios das titulacións impartidas polo centro e a participación na elaboración daqueloutras compartidas con outros centros.

2) A organización e a xestión dos servicios docentes que lle correspondan.

3) A coordinación e a supervisión da actividade docente no centro de departamentos e profesorado.

4) A elaboración dun calendario de actividades lectivas para cada curso, que se deberá facer público con anterioridade á apertura da matrícula.

5) A realización das actividades de administración académica que lle encomende a Xunta de Goberno.

6) A administración dos servicios, equipamentos e recursos do centro.

7) O coñecemento da actividade investigadora que se desenvolva no centro.

8) A realización de actividades de formación permanente ou de extensión universitaria no seu ámbito de competencia.

9) A organización e a promoción de estudios de posgrao.

10) A organización de cursos, congresos, conferencias e outras actividades extracurriculares que mellor sirvan para complementar a actividade docente e para divulgar a actividade investigadora que se desenrola na propia Facultade de Humanidades.

TITULO I

CAPITULO I. DA XUNTA DE FACULTADE

Artigo 3 .

Os órganos de goberno e administración da Facultade son os seguintes:

1) A Xunta de Facultade

2) O Decano

3) O Vicedecano

4) O Secretario

Artigo 4.

A Xunta de Facultade é o órgano colexiado de goberno do centro, aproba as liñas xerais de actuación no ámbito da Facultade e supervisa o labor dos seus órganos de dirección e xestión.

Artigo 5 .

1. A Xunta de Facultade estará composta por:

a. O Decano, que a presidirá e convocará.

b. O Vicedecano e o Secretario, que o será tamén da xunta.

c. O seguinte profesorado censado no centro:os funcionarios docentes; os eméritos; os axudantes; os contratados a tempo completo e os contratados a tempo parcial, nunha proporción que non exceda do 10% da suma dos profesores dos tipos precedentes.

d. Unha representación dos bolseiros de investigación con docencia no centro nunha proporción do 5% do total da xunta.

e. Unha representación de estudiantes do primeiro e segundo ciclo nunha porcentaxe do 20% do total da xunta, e unha represenación de estudiantes do terceiro ciclo nunha porcentaxe do 5% do total da xunta.

f. Unha representación do persoal de administración e servicios censado no centro nunha proporción do 5% do total da xunta, cun mínimo de dous.

g. O profesorado e axudantes non censados no centro sempre que a súa carga docente anual nel non sexa inferior a 9 créditos.

2. Tamén poderán asistir á Xunta de Facultade , con voz, pero sen voto:

a. O profesorado visitante.

b. Todo o profesorado, axudantes, ou bolseiros que impartan docencia no centro e non sexan membros dela.

3. Tódolos representantes elexidos serano por dous anos, salvo os estudiantes que o serán por un ano. A condición de membro da xunta perderase ó cesa-la vinculación académica ou administrativa co centro.

4. O profesorado, axudantes e bolseiros estarán censados soamente nun centro desta Universidade, nas condicións que estableza a Xunta de Goberno.

5. Os estudiantes figurarán no censo daqueles centros responsables da titulación ou titulacións en que estean matriculados.

CAPITULO II. DO DECANO

Artigo 6.

1. O Decano representa a Facultade , exerce a súa dirección, preside e coordina a actuación dos seus órganos colexiados e executa os seus acordos.

2. O Decano será elexido pola Xunta, de entre os catedráticos ou profesores titulares de Universidade que presten nela os seus servicios, e será nomeado polo Rector.

3. -Son competencias do Decano:

a. A representación da Facultade.

b. A presidencia das reunións da Xunta de Facultade e a de calquera outro órgano colexiado delas, así como a execución dos seus acordos.

c. A vixilancia do cumprimento da legalidade en tódalas actuacións da Facultade.

d. A dirección da política académica da Facultade .

e. A proposta ó Rector do nomeamento e cesamento do Vicedecano e do Secretario da Facultade.

f. A vixilancia do respecto dos dereitos e do cumprimento dos deberes de tódolos membros da comunidade universitaria que desenvolven o seu labor no centro.

g. O control do cumprimento das obrigas docentes e discentes.

h. A vixilancia do patrimonio do centro.

i. O exercicio das restantes funcións que se deriven do seu cargo, así como aqueloutras que lle sinalen os Estatutos da Universidade ou a lexislación universitaria.

4. As competencias do Decano extenderanse a tódolos asuntos concernentes ó goberno e á administración das facultades, de non seren atribuídas a outros órganos.

Artigo 7.

1. O Vicedecano será nomeado polo Rector, por proposta do Decano, de entre os membros da comunidade universitaria da Facultade.

2. É labor do Vicedecano coordinar ou dirixir, baixo a autoridade do Decano, a área ou áreas de competencias que este lle asigne.

3. O Vicedecano cesará no seu cargo por demisión ou por decision do Rector, por proposta do Decano.

Artigo 8.

1) O Secretario da Facultade é quen dá fe dos actos e acordos dos órganos de goberno, representación e administración do centro e, como tal, ten encomendada a custodia dos libros de actas e a expedición das certificacións dos acordos e de tódolos actos ou feitos que consten nos documentos oficiais do centro. Ademais, exercerá aqueloutras funcións que lle delegue o Decano.

2) O Secretario será nomeado polo Rector, por proposta do Decano, de entre os profesores do centro.

3) O Secretario cesará por demisión ou por decisión do Rector, por proposta do Decano.

CAPITULO III. DO FUNCIONAMENTO DA XUNTA DE FACULTADE

Artigo 9.

1) O Pleno da Xunta de Facultade convocarao o Decano ou na súa ausencia o Vicedecano, con carácter ordinario polo menos unha vez por trimestre, e con carácter extraordinario a iniciativa do Decano ou pedimento de:

· Un tercio dos seus membros.

· As tres cuartas partes da totalidade dos integrantes dun sector no pleno da Xunta de Facultade: PAS, bolseiros, estudiantes ou profesores.

· A maioría simple da Comisión Permanente.

Artigo 10.

1. Na convocatoria deberá consta-la orde do día, data, hora e lugar da reunión. A convocatoria deberá ser entregada, cando menos con setenta e dúas horas de anticipación correspondentes a días hábiles, excepto no caso de Xunta Extraordinaria e Urxente.

2. Na convocatoria ordinaria, a documentación ou información relacionada directamente cos asuntos da convocatoria, que impliquen toma de decisións, deberán estar ó dispor dos membros da Xunta, na medida do posible cunha antelación de corenta e oito horas.

Artigo 11.

1. A orde do día será elaborada polo Decano. Nela figurarán as mencións de aprobación da Acta da sesión anterior, asuntos de trámite, peticións e preguntas (agás que a Xunta se convoque con carácter extraordinario).

2. Con antelación á convocatoria da Xunta ordinaria poderán presentarse propostas de inclusión de puntos a tratar na orde do día, que deberán ser avaladas polas sinaturas do quince por cento dos membros da Xunta ou os ¾ dun sector.

Artigo 12.

A Xunta de Facultade e toda-las comisións constituiranse válidamente en primeira convocatoria coa asistencia da maioría absoluta dos seus membros. En segunda convocatoria esixirase, alomenos, a presencia de ¼ dos membros da Xunta, que se constituirá media hora despois da primeira.

Para debatila moción de censura do Decano será necesaria a presencia da maioria absoluta dos membros da Xunta.

Artigo 13.

1) A Xunta de Facultade será presidida polo Decano ou quen faga as súas veces, asistido dunha mesa integrada polo Vicedecano e Secretario.

2) O Decano dirixe e ordena o desenvolvemento dos debates.

3) A mesa, tendo en conta a opinión da Xunta de Facultade, interpretará o presente Regulamento, en casos de dúbida ou omisión. Tamén decidirá sobre calquera outra cuestión que se lle encomende no presente Regulamento, ou que o Decano lle consulte.

Artigo 14.

1) As decisións pódense tomar por asentimento ou por votación. Para axiliza-lo procedemento, as votacións poderán ser públicas e a man alzada, ou secretas (cando así sexa solicitado por algún membro, por escrito ou oralmente na sesión).

2) Non se admitirá a delegación de voto nin en membro da Xunta nin en persoas alleas.

Tampouco será admitido o voto anticipado.

Artigo 15.

1) Unha vez debatido un punto da orde do día terá lugar, se procede, a votación. A votación decidirase por maioría simple, agás nos casos en que se contemple outra fórmula.

2) De existiren unicamente dúas propostas, efectuarase unha votación entre ámbalas dúas. Aprobarase a que acade a maioría simple en primeira votación.

3) De haber máis de dúas propostas, efectuarase unha primeira votación conxunta de todas elas. Posteriormente procederase a unha segunda votación entre as dúas máis votadas.

4) En caso de empate procederase a unha nova votación, despois da que, de persisti-lo empate, decidirá o voto de calidade do Decano.

Artigo 16.

A Xunta da Facultade arbitrará os mecanismos necesarios para que os diversos sectores desta estean puntualmente informados dos acordos que se adopten tanto no Pleno da Xunta coma nas Comisións.

Artigo 17.

1) A Secretaría da Xunta desempeñaraa o Secretario da Facultade que, na súa condición de fedatario dos actos e acordos daquela, levantará Acta de cada sesión. Nos supostos de imposibilidade de asistencia por parte do Secretario, fará as súas veces outro membro da Xunta, mediante designación decanal.

2) En cada Acta especificaranse necesariamente:

a. Os membros da Xunta de Facultade, nominalmente designados, que asistiron á sesión, engadindo as ausencias comunicadas.

b. A orde do día da sesión.

c. As circunstancias de lugar e tempo nas que se celebrou.

d. Os puntos principais das deliberacións. Como anexos, documentación oficial manexada na Xunta.

e. O contido dos acordos, especificando se foron aprobados e o número de votos de cada unha das propostas.

f. Na acta figurará, previa solicitude dos respectivos membros da Xunta, o voto contrario ó acordo adoptado, a súa abstención e os motivos que a xustifican, ou o sentido do seu voto favorable. Así mesmo, calquera membro ten dereito a solicita-la transcrición íntegra da súa intervención ou proposta, sempre que achegue no acto, ou no prazo que sinale a mesa, o texto correspondente.

g. Cada Acta será asinada polo Secretario -ou quen faga as súas veces-, co Visto e Prace do Decano.

h. As Actas aprobaránse na seguinte sesión ordinaria da Xunta de Facultade.

Artigo 18.

1) As Actas, unha vez aprobadas, quedarán baixo a custodia do Secretario da Facultade, e poderán ser consultadas na súa presencia por calquera membro da Facultade.

2) Só darán fe dos acordos aprobados pola Xunta, as certificacións expedidas polo Secretario co Visto e Prace do Decano .Con anterioridade á preceptiva aprobación da Acta tamén poderán emitirse certificacións sobre os acordos que se adoptaron.

CAPITULO IV. DA COMISIÓN PERMANENTE DA XUNTA DE FACULTADE

Artigo 19 .

A Comisión Permanente da Xunta de Facultade, de acordo co disposto no art. 87.2 dos Estatutos da Universidade, estará integrada por:

· O Decano.

· O Vicedecano.

· O Secretario , que o será tamén da Comisión Permanente.

· Unha representación proporcional dos distintos integrantes da Xunta, non podendo exceder o número total dos seus membros dun tercio dos membros da Xunta de Facultade.

Artigo 20.

A Comisión Permanente estará integrada por unha representación dos diversos sectores universitarios, na seguinte proporción:6 pertencerán ó sector do profesorado, 3 ó dos estudiantes de 1º e 2º ciclo, 1 ó dos estudiantes de 3º ciclo, 1 ó de axudantes e bolseiros e 1 será membro de PAS. Recabaráse a presencia do Xefe de Negociado de Asuntos Económicos, con voz e sen voto (de non ser o representante do PAS na Comisión), cando se inclúan nas sesións materias da súa competencia.

Artigo 21.

A Comisión Permanente será elixida entre os membros da Xunta de Facultade, elixindo cada sector ós seus representantes nos seguintes plazos:o profesorado e o PAS, na primeira reunión de cada curso académico; os estudiantes e bolseiros despois de cada elección dos seus representantes na Xunta de Facultade. De forma extraordinaria, renovarase a representación de un ou máis sectores, cando así o acorde a maioría simple da Xunta de Facultade.

Artigo 22.

A Comisión Permanente é competente para:

1. Coñecer e decidir sobre os asuntos de trámite.

2. Coñecer e adoptar acordos sobre calquera asunto que, sendo competencia da Xunta e non estando reservado expresamente ó Pleno, fóralle delegado por este.

3. Asesorar en tódalas cuestións que o Decano lle someta no exercicio das súas competencias.

4. Coñecer e decidir sobre os asuntos que lle sexan presentados polas Comisións Delegadas e elevalos, no seu caso, ó Pleno.

5. Informa-lo proxecto de orzamento elaborado polo equipo decanal antes do seu debate no Pleno da Xunta de Facultade, propoñendo a distribución das partidas de equipamento docente do Centro e de comunicacións.

6. Propo-la dotación de medios que cubran as necesidades de administración e servicios, e de funcionamento das Comisións que así o precisen.

7. Propo-la distribución dos espacios dedicados á investigación, docencia e administración.

8. Face-lo seguimento do estado do edificio e facer proposicións sobre a súa conservación e reparación.

Artigo 23.

O Decano da Facultade informará ó Pleno na primeira sesión que este celebre con posterioridade á última celebrada pola Comisión Permanente, de tódalas actuacións da Comisión, con excepción das referidas a asuntos de trámite.

Artigo 24.

1) A Comisión Permanente reunirase con carácter ordinario como mínimo tres veces ó ano, e con carácter extraordinario sempre que o Decano o considere oportuno, ou a pedimento dun tercio dos membros da Comisión Permanente. A reunión ordinaria da Comisión poderá ser suplida por unha Xunta de Facultade.

2) A convocatoria ordinaria da Comisión Permanente farase como mínimo con 48 horas de antelación. En tódolos demais aspectos referidos ó funcionamento da mesma, estarase ó previsto neste Regulamento para a Xunta de Facultade.

3) Os membros da Comisión Permanente cesarán no momento en que perdan a súa condición de membros da Xunta. No caso de vacantes en cada un dos sectores, procederase a nomear ó suplente dentro do sector correspondente, no prazo de tempo máis breve posible.

CAPITULO V. DAS COMISIONS DELEGADAS

Artigo 25.

1) A Xunta de Facultade creará Comisións Delegadas. As Comisións son instancias de asesoramento, que actúan por delegación da Xunta de Facultade. A súa función é emitir informe, coordinar, estudiar e elaborar propostas de carácter operativo sobre os asuntos que este regulamento ou os órganos competentes de goberno da Facultade lles encomenden. Para o desempeño dos seus cometidos, as comisións contarán coa colaboración do persoal de Administración adscrito á Facultade.

2) As Comisións Delegadas serán a Académica e a de Actividades Culturais e Complementarias. A Comisión de Biblioteca da Facultade rexerase polos Estatutos da Universidade de Santiago e o Regulamento da Biblioteca Universitaria.

3) Á marxe destas Comisións de carácter estable, a Xunta de Facultade poderá decidi-la creación de Comisións de carácter conxuntural para resolveren sobre situacións puntuais ou asuntos concretos.

Artigo 26.

1) Os membros das Comisións Delegadas serán elixidos por cada un dos sectores na Xunta de Facultade. Ademais dos compoñentes especificados para cada caso, elixidos por sectores, formará parte delas o Decano, ou a persoa en quen delegue, que será quen presida.

2) Para o funcionamento ordinario das Comisións Delegadas seguirase, cando sexa de aplicación, a normativa prevista no presente regulamento para a Xunta de Facultade.

3) As reunións das Comisións Delegadas serán convocadas por escrito cunha antelación mínima de 48 horas, agás nos casos de urxencia.

Artigo 27.

1) A Comisión Académica estará presidida polo Decano e dela formarán parte o Vicedecano, cinco membros do profesorado, un do alumnado de 1º e 2º ciclo, un do terceiro ciclo ou bolseiro e un membro do persoal de Administración e Servicios. Actuará como Secretario ó da Facultade.

2) Correspóndelle á Comisión Académica todo o relacionado co desenvolvemento da actividade docente e investigadora do Centro. En particular, informará sobre a reforma e seguimento dos planos de estudios, coñecerá e informará sobre calendarios de exames e horarios.

3) Coñecerá e informará sobre a programación das materias correspondentes ás titulacións radicadas no Centro, analizará e promoverá a mellora da calidade didáctica, contemplando a especificidade e orientación académica e laboral das titulacións impartidas na Facultade.

4) Proporá a normativa para a obtención do título de grao e desenvolverá aqueloutras funcións que expresamente lle sexan delegadas polo Pleno da Xunta.

5)Proporá e tramitará as validacións ou adaptacións e estudios.

Artigo 28.

1) A Comisión de Actividades Culturais e Complementarias estará estará presidida polo Decano e dela formarán parte o Vicedecano, catro membros do profesorado, catro do alumnado de 1º e 2º ciclo, un do terceiro ciclo ou bolseiro e un membro do persoal de Administración e Servicios. Actuará como Secretario ó da Facultade.

2) A Comisión ten por funcións:

a. Encargarse da dinamización cultural da Facultade.

b. Estudiar e facer propostas encol da organización daquelas actividades de carácter extracurricular que sexan de interese para o conxunto dos membros da Facultade.

c. Colaborar nas actividades que organicen os Departamentos ou calquera outro colectivo da Facultade, logo da súa valoración.

d. Facer propostas verbo do reparto e xestión da partida presupostaria anual de extensión universitaria da Facultade.

e. Encargarse de tarefas de Normalización Lingüística, promovendo e analizando todo o relacionado coa lingua e cultura galega na vida académica e de funcionamento ordinario da Facultade.

f. Aqueloutras que expresamente lle sexan delegadas polo Pleno da Xunta.

TITULO II. DA ELECCION E REVOGAMENTO DO DECANO

CAPITULO I. DA ELECCION DO DECANO

Artigo 29.

1) Vacante o cargo de Decano, nun prazo non superior a quince días, o Decano en funcións procederá á constitución da Xunta Electoral.

2) A Xunta Electoral estará formada por un membro do persoal de administración e servicios, un estudiante, un axudante/bolseiro e un profesor, cos correspondentes suplentes, elixidos todos en sorteo público; o Secretario da Facultade, que o será tamén da Xunta Electoral, e o Decano en funcións.

3) A condición de membro da Xunta Electoral do centro é incompatible coa de candidato. Se algún dos membros da Xunta Electoral fose candidato, deberá renunciar ó seu posto na mesma e será substituído polo corresponden suplente. No caso do Secretario e do Decano en funcións, serán substituídos polo profesor ou profesora más novo e máis antigo, respectivamente.

4) A Xunta Electoral actuará consonte a Lei de Réxime Xurídico das Administracións Públicas e Procedemento Administrativo Común.

5) A Xunta Electoral establecerá os prazos de presentación de candidaturas, proclamación provisoria e definitiva dos candidatos ou candidatas, e períodos de reclamacións, de acordo coa normativa da Universidade.

6) De non haber ningún candidato, a Xunta Electoral reabrirá o proceso tal como se indica no apartado cinco deste artigo.

7) De non haber ningún candidato na segunda convocatoria, o Decano en funcións convocará, no prazo máximo de dez días, unha Xunta Extraordinaria para analiza-la situación e adopta-las medidas que se estimen oportunas.

Artigo 30.

1) Transcorrido o prazo da campaña electoral nos termos sinalados pola normativa da Universidade, convocarase unha sesión extraordinaria da Xunta de Facultade, que terá como único punto da orde do día a elección do Decano. Presidirá a sesión o Decano ou, de ser este candidato, o catedrático de Universidade ou, no seu defecto, o profesor titular de Universidade mais antigo da Universidade de Santiago dos presentes.

2) Os candidatos disporán dun máximo de 30 minutos para expoñe-los seus programas. Sortearase entre os candidatos a orde de intervención.

3) Realizada a exposición polos candidatos e logo de debate, procederase á votación nominal e secreta do tódolos membros da Xunta.

4) Rematada a votación, no mesmo acto procederase ó escrutinio, e será proclamado Decano electo quen obtivese a maioría absoluta dos sufraxios.

5) Se ningún dos candidatos obtivese a maioría absoluta procederase a unha segunda votación. Resultará elixido o candidato que obteña o maior número de votos favorables.

6) De producirse empate entre dous ou máis candidatos procederíase a unha nova votación no prazo máximo de tres días. De permanece-lo empate, procederase por sorteo.

CAPITULO III. DA REVOGACION DO DECANO

Artigo 31.

1) O Decano poderá ser revogado mediante moción de censura

2) A moción de censura, para ser tramitada, deberá ir asinada por un tercio dos membros da Xunta, e incluír o nome dun candidato alternativo.

3) Cando concorran estas circunstancias, o Decano ou quen faga as súas veces, terá que convocar unha Xunta Extraordinaria con este único punto da orde do día nun prazo máximo de 15 días hábiles.

Artigo 32.

Tanto o candidato proposto como o Decano, disporán dun prazo máximo de 30 minutos para expoñe-las súas posicións. Tralo oportuno debate procederase á votación nominal e secreta. Comenzará a exposición o candidato alternativo proposto.

Artigo 33.

Se a moción de censura obtivese o voto favorable da maioría absoluta dos membros presentes da Xunta será proclamado Decano electo o candidato porposto na moción de censura.

Se a moción de censura non acadase a maioría absoluta dos presentes considérase refugada, e os asinantes da mesma non poderán presentar outra durante o resto do mandato do Decano.

TITULO III. A REFORMA DO REGULAMENTO

Artigo 34.

A iniciativa para a reforma do Regulamento será adoptada polo Decano a iniciativa propia ou tomando en consideracíon unha proposta asinada polo 25% dos membros da Xunta de Facultade.

Artigo 35.

As propostas de reforma do Regulamento deberán estar debidamente articuladas e motivadas. Recibida a proposta, será sometida a votación para a súa toma en consideración no Pleno da Xunta. Se a proposta recibe os votos favorables do 50% dos membros desta presentes, abrirase un prazo para a presentación de enmendas e a súa análise nunha Comisión específica designada pola Xunta e coa mesma representación que teñan os diversos sectores no Pleno.

Artigo 36.

Unha vez aprobado o texto pola correspondente Comisión, será elevado ó Pleno. Para que a reforma sexa adoptada será preciso que reciba o voto da maioría absoluta dos presentes no Pleno da Xunta. De non ser así, a proposta de reforma considerarase refugada, e non poderá proporse idéntica reforma ata transcorrido un prazo dun ano.